Tags-Mausam

guloñ ne band-e-qabā hai kholā, havā se bū-e-junūñ bhī aa.e
kareñge is mausam-e-vafā meñ ham apnī takmīl chal ke dekheñ

aatā rahe yuuñ hī sadā mausam-e-gul
silsila-e-dil-zadagāñ baaqī rahe

gulshan-e-dil abhī shādāb hai pazhmurda nahīñ
mausam-e-ġham ne use kitnā harā rakkhā hai

shāḳh-e-gul ke gale se lag lag kar
rote haiñ mausam-e-ḳhizāñ meñ ham

zaḳhmoñ ke na.e phuul khilāne ke liye aa
phir mausam-e-gul yaad dilāne ke liye aa

rok pā.eñge na lamhāt ke mausam ham ko
ek dīvār zamāna to havā.eñ ham log

is badalte hue mausam kā bharosā bhī nahīñ
giilī miTTī pe koī naqsh sajā.eñ ham log

yahāñ ke saare mausam ek se haiñ
yahī is shahr kī taaza ḳhabar hai

vo hañstā hai magar ruḳhsār nam haiñ
ye shāyad pichhle mausam kā asar hai

na hasīñ ḳhvāboñ kā mausam aur na gul kī aarzū
itnī māyūsī meñ bhī ham zindagī taane rahe

mausam-e-hijrat meñ jo apnoñ se begāne rahe
vo shab-e-zulmat meñ kitne jaane pahchāne rahe

mujh ko be-rañg hī kar deñ na kahīñ rañg itne
sabz mausam hai havā surḳh fazā niilī hai

zulf kī shaam sub.h chehre kī
yahī mausam janāb de diije

vo kare tajziya-e-mausam-e-gul jis kī nazar
bazm-e-gul meñ hadd-e-nasrīn-o-saman se guzre

maiñ aur tū jab ghar se chale the
mausam kitnā badal gayā thā

pahle purvā.ī se dil meñ ek kasak sī uThtī thī
ab ye mausam kuchh nahīñ karte lekin ḳhvāb dikhāte haiñ

tire visāl ke mausam meñ ustuvār huā
koī ajab sā ta.alluq jahān-e-fānī se

uchak liyā hai unheñ bhī ḳhizāñ ke mausam ne
vo phūl-pāt ki jin ko bahār honā thā

rañj kī ik be-mausam Tahnī dil se yuuñ paivasta hai
puurī shāḳh harī ho jaa.e ek sirā chhū lene meñ

mausam thā ḳhush-gavār to manzar thā ḳhush-gavār
ab vo kashish kahāñ hai nazāroñ kī god meñ