Tags-Mausam

tere phūloñ se ye ḳhushbū to nahīñ aatī thī
mausam-e-lams se tū qarya-e-zarḳhez na thā

mere andar kā pāñchvāñ mausam
kis ne dekhā hai kis ne jaanā hai

jab bhī guzre mire āñgan se vafā kā mausam
terī chāhat kā nayā phuul khilā detā hai

mausam-e-abr kī to baat yūñhī aa.ī thī
kyuuñ sharābor huā aap kā paikar saarā

us kī hathelī ke dāman meñ saare mausam simTe the
us ke haath meñ jaagī maiñ aur us ke haath se ujlī maiñ

ahl-e-junūñ kī lāla-kārī mausam kī pāband nahīñ
fasl-e-ḳhizāñ meñ phuul khule haiñ zindāñ kī dīvāroñ par

mahv-e-hairat the ki be-mausam nadī pāyāb thī
bas khaḌe dekhā kiye utre nahīñ paanī meñ ham

zabāñ-bandī ke mausam meñ galī-kūchoñ kī mat pūchho
parindoñ ke chahakne se shajar ābād hote haiñ

haa.e us zamāne meñ ahl-e-fan kī be-qadrī
mausam-e-zamistāñ meñ jaise chāñdnī tanhā

gulshan pe udāsī kī fazā dekh rahā huuñ
vo dard ke mausam ko badalne nahīñ dete

ham se bhī pūchho sulagte hue mausam kī kasak
ham bhī har dasht pe barse haiñ ghaTāoñ kī tarah

aglā mausam ho tabāhī kā ye mumkin hai miyāñ
ek muddat huī bastī meñ qalandar aa.e

tum hameñ ek din dasht meñ chhoḌ kar chal diye the tumheñ kyā ḳhabar yā aḳhī
kitne mausam lage haiñ hamāre badan par nikalne meñ ye bāl-o-par yā aḳhī

zard pattoñ ke ThanDe badan apne hāthoñ pe le kar havā ne shajar se kahā
agle mausam meñ tujh par na.e barg-o-bār ā.eñge tab talak sabr kar yā aḳhī

husn-parī ho saath aur be-mausam kī bārish ho jaa.e
chhatrī kaun ḳharīdegā phir jitnī bārish ho jaa.e

vo jo haiñ is gulshan-e-hastī meñ ab mahv-e-fanā
un ke aage mausam-e-bād-e-ḳhizāñ ko ishq hai

mirī sochoñ meñ yuuñ rach bas ga.e haiñ shabnamī mausam
tavātur se tah-e-mizhgāñ namī maujūd rahtī hai

sar-e-darbār-o-maqtal ek sā mausam anā kā hai
garāñ sar meñ hamesha sar-kashī maujūd rahtī hai

visāl-e-jism kī sūrat nikal to aatī hai
diloñ meñ hijr kā mausam bahāl rahtā hai

kis ke jism kī bārish ne sairāb kiyā
kyuuñ uḌnā mausam kā parinda bhuul gayā