Tags-Mausam

phūloñ ke khilne kā mausam duur talak lekin
ġhuncha ġhuncha simTe rahnā achchhā lagtā hai

mujh meñ yuuñ taaza mulāqāt ke mausam jaage
aa.ina hañsne lagā hai mirī tayyārī par

saarā manzar hī badal jā.egā 'ahmad' dekhnā
mausam-e-ruḳhsār-o-lab ko der hotī jā.egī

ab ke vasl kā mausam yūñhī bechainī meñ biit gayā
us ke hoñToñ par chāhat kā phuul khilā bhī kitnī der

in āñkhoñ meñ rañg tumhāre khulte haiñ
ye mausam kab phuul khilāne aate haiñ

ā.īnoñ se dhuul miTāne aate haiñ
kuchh mausam to aag lagāne aate haiñ

jaate mausam ne jinheñ chhoḌ diyā hai tanhā
mujh meñ un TūTte pattoñ kī jhalak hai kitnī

ye tilism-e-mausam-e-gul nahīñ ki ye mojaza hai bahār kā
vo kalī jo shāḳh se gir ga.ī vo sabā kī god meñ pal ga.ī

hijr ke mausam meñ yaad aatī hai ḳhushbū dostoñ kī
ham udāsī meñ bhī yāroñ kī rifāqat chāhte haiñ

bahaktī haiñ havā.eñ phuul be-mausam bhī khilte haiñ
jahān-e-āb-o-gil ham ko ba-andāza nazar aayā

kuchh zaḳhm hī khā.eñ chalo kuchh gul hī khilā.eñ
har-chand bahārāñ kā ye mausam to nahīñ hai

zindagī ke saath ham nikle the le kar kitne ḳhvāb
zindagī bhī ḳhatm hai mausam badaltā hī nahīñ

sukh kā mausam jab aatā hai
jism bhī paanī ho jaate haiñ

mausam thā numā.ish kā magar aañkh na kholī
jānāñ tire zaḳhmoñ ko siyāsat nahīñ aa.ī

phir palaT ā.eñge 'sīrat' ye junūñ ke mausam
dhajjiyāñ jeb o garebān kī sī leñ kachchī

vo mulāqāt kā mausam nahīñ aayā ab ke
jo sar-e-ḳhvāb sañvartā rahā pahle pahle

laboñ kī sharārat nazar se ishārat
dam-e-vasl kaisā hayāoñ kā mausam

ḳhudā jaane is rut meñ kyā gul khilā.e
gulistāñ kā joban ye kaliyoñ kā mausam

ḳhabar hai ki aayā gulāboñ kā mausam
guloñ ke badan par hai kāñToñ kā mausam

jo pyāse haiñ 'bāno' tum un ko sadā do
ki sahrā meñ utrā hai chashmoñ kā mausam