Tags-Mausam

sard mausam meñ be-gharoñ kī dashā
bebasī ḳhud bhī ro rahī hogī

andar bhī ik habs kā mausam
bāhar bhī barsāt nahīñ thī

laTakte sūkhte ye naqsh yūñhī ro.eñge
guzar gayā hai jo mausam thā rañg bharne kā

ham kahāñ the us samay us vaqt jab
tere andar ke ye sab mausam bane

garm aañsū aur ThanDī aaheñ man meñ kyā kyā mausam haiñ
is baġhiyā ke bhed na kholo sair karo ḳhāmosh raho

puurā chāñd aur jagmag taare yādoñ kī bārāt
is mausam meñ maḳhmal par bhī so saktā hai kaun

mausam-e-lutf-e-atā hai abhī maiḳhāne meñ
jaam kyā chiiz hai ye tum ko surāhī deñge

aise mausam meñ to har shāḳh pe phuul aate haiñ
āḳhir is mausam-e-namnāk se Dartā kyuuñ hai

mausam ne jab karvaT badlī
chādar ne kambal ko dekhā

din Dhale dekh liyā thā koī uḌtā bādal
kunmunātī hai fazā mausam-e-bārāñ kī tarah

ka.ī mausam mujh par guzar ga.e ehrām ke in do kapḌoñ meñ
kabhī patthar chuum nahīñ saktā kabhī izn-e-tavāf nahīñ hotā

mausam bahār kā thā ḳhizāñ jald aa ga.ī
hañstā huā chaman mirā vīrān ho gayā

is qadar thā udaas mausam-e-gul
ham ne āb-e-ravāñ pe sar rakkhā

nannhī-munnī koñpaloñ ko rañg-o-nik.hat chāhiye
kuchh havā kā ḳhauf kuchh mausam kī dildārī karūñ

bārish huī to phūloñ ke tan chaak ho ga.e
mausam ke haath bhiig ke saffāk ho ga.e

abhī se hijr kī talḳhī meñ mar jā.ūñgā jān-e-jāñ
abhī mausam vafā kā hai jafā.eñ nā-munāsib haiñ

fasurda phir hai is bastī kā mausam
kahīñ phir nā-gahānī ho ga.ī kyā

mausam-e-gul ḳhizāñ-mizāj sahī
mar ke nikleñge āshiyāne se

ḳhunkī itnī bhī to lāzim nahīñ is mausam meñ
paas josh-e-gul-o-dil garmī-e-ayyām karo

machaltī shoḳh maujoñ ko maiñ apne naam kyuuñ likkhūñ
ki āḳhir ḳhushk hogā mausam-e-barsāt kā dariyā