Tags-Mausam

sulag rahā hai chaman meñ bahār kā mausam
kisī hasīn ko āvāz do ḳhudā ke liye

ḳhirām jalve ke naqsh-e-qadam the lāla-o-gul
kuchh aur us ke sivā mausam-e-bahār na thā

añgāroñ ke mausam meñ
jismoñ kā sā mela hai

vahī gulāb ke mausam vahī sharāb ke daur
vahī sharīr ghaTā.eñ vahī bharī barsāt

thā ajab seminar kā mausam tabsire ho rahe the har fan par
shā.erī par sabhī kā qaul thā ye gard kitnī jamī hai darpan par

jaise har chiiz nigāhoñ meñ Thaharnā chāhe
dekh lenā kabhī mausam pe ġhazal aa.e hue

in likhe lafzoñ meñ likh muzhda na.e mausam kā
kahīñ mahtāb kahīñ gul kahīñ chehra likh de

suhānī shaam ke mausam meñ kyuuñ udāsī hai
havā udhar se chalī to kahāñ pe Thahregī

yaad mausam vo purāne aa.e
zaḳhm hañsne ke zamāne aa.e

mausam haiñ do hī ishq ke sūrat koī bhī ho
haiñ us ke paas aa.ine hijr-o-visāl ke

mausam-e-gul agar is haal meñ aayā bhī to kyā
ḳhūn-e-gul chehra-e-gulzār pe mal jā.egā

tohfa meñ milī panting meñ
chāroñ mausam

peḌ ugleñge syāhī kā samundar dekhnā
mausam-e-ḳhush-rañg 'muztar' zaḳhm-e-pā ho jā.egā

ranjish jo hamāre beach rahī to aag falak ne barsā.ī
ab soch na kuchh mausam ko samajh ai yaar ye pahlī bārish hai

rañg mausam ke saath laa.e haiñ
ye parinde kahāñ se aa.e haiñ

surma.ī shaam hai mausam hai suhānā aanā
is se pahle ki maiñ ho jā.ūñ fasāna aanā

bujhe bujhe the bahut naqsh jab ki mausam ke
lahū ke rañg kā un pe nikhār kaise huā

shāḳh-e-gulāb lagtī hai Daalī babūl kī
mausam ke saath saarī lachak ḳhatm ho ga.ī

na jaane mausam-e-talvār kis tarah guzrā
mire lahū kā shajar to jhukā jhukā sā thā

mausam-e-gul na sahī shaġhl-e-junūñ achchhā hai
hamdamo! tez rahe gardish-e-ḳhūñ, achchhā hai