Tags-Mausam

sail-e-ḳhūñ shahr kī galiyoñ meñ dar aayā hai 'farāz'
aur tū ḳhush hai ki ghar jaane kā mausam aayā

mausam-e-gul hai fasl-e-jāma-darī
ehtiyāj-e-takallufāt ga.ī

mausam-e-sarmā kī raat
jis ke sardī meñ rache barfīle haath

jo aayā hijr kā mausam to kyā kareñge ham
jo tajrabe meñ nahīñ vo savāl hai us kā

kyā hogā chaar phūloñ se ai mausam-e-bahār
ye to hamāre gosha-e-dāmāñ meñ aa ga.e

yaad phir aa.ī tirī mausam salonā ho gayā
shaġhl sā āñkhoñ kā bas dāman bhigonā ho gayā

jaane kyuuñ aa ga.ī phir yaad usī mausam kī
jis ne 'shabnam' ko havāoñ se bachā.e rakkhā

maiñ jāntā huuñ ki mausam ḳharāb hai phir bhī
koī to saath hai is dukh-bharī masāfat meñ

vaqt, mausam 'nazar' nigāh meñ rakh
kis ne tujh se kahā ye raag alaap

maiñ āḳhir kaun sā mausam tumhāre naam kar detā
yahāñ har ek mausam ko guzar jaane kī jaldī thī

us kī ḳhush-bū se mahak kar phuul ban jaatā hai dil
mausam-e-gul kī tarah aatā hai vo jaatā hai vo

ik ḳhalā dil meñ bahut din se makīñ hai ab to
yaad guzrā huā mausam bhī nahīñ yaar ke saath

biit gayā sāvan kā mahīna mausam ne nazreñ badlīñ
lekin in pyāsī āñkhoñ se ab tak aañsū bahte haiñ

us ke bāġhāt pe utrā huā thā mausam-e-rañg
qābil-e-dīd har ik samt se manzar koī thā

mausam-e-gul ko kyā ḳhabar shorish-e-abr-o-bād meñ
tā.ir-e-dil udaas hai shāḳh-e-panāh ke liye

mausam se rañg-o-bū haiñ ḳhafā dekhte chalo
ye kyā chalī chaman meñ havā dekhte chalo

mausam-e-gul meñ abr-e-bārāñ meñ
dil pe rahtā hai iḳhtiyār kahīñ

maiñ ḳhizāñ meñ bhī parastār rahā huuñ us kā
mausam-e-gul meñ chaman-zār ko kaise chhoḌūñ

ye na pūchhe koī mausam-e-rañg kī pahlī pahlī adāvat ne kyā dukh diye
phuul kī aag par shab guzārī ga.ī ḳhaar kī nok par din guzārā gayā