Tags-Mausam

maiñ vo gulshan-gazīda huuñ ki tanhā.ī ke mausam meñ
nahīñ hote agar kāñTe to Dastī hai kalī mujh ko

hamārī pyaas kā ahvāl reg-zāroñ par
sulagte chīḳhte mausam lavoñ se likkheñge

fasurda yuuñ na hote ġhuncha-o-gul mausam-e-gul meñ
agar dil se chaman kī ābiyārī bāġhbāñ karte

mausam-e-gul kā zikr rahne de
ye mirī baat kā javāb nahīñ

usī daraḳht ko mausam ne be-libās kiyā
maiñ jis ke saa.e meñ thak kar udaas baiThā thā

terī nadiyoñ meñ naġhmāt aur qahqahe
pyārī fasleñ tirī pyāre mausam tire

mausam-e-dīd meñ ik sabz-parī kā saaya
ab gila kyā ki tabī.at to harī rahnā thī

duur tak chhā.e the bādal aur kahīñ saaya na thā
is tarah barsāt kā mausam kabhī aayā na thā

har aa.e mausam meñ koñpaloñ ko sipās-bār-āvarī milegā
to shāḳh-e-nā-varda-e-samar ko sazā-e-radd-e-sipās deñge

harārat-o-bārdat kī khojī havā.eñ mahv-e-safar raheñgī
badaltī rut kī ḳhabar hamesha tuyūr-e-mausam-shanās deñge

bichhḌe huoñ kī yaad to aa.egī jīte-jī
mausam rafāqatoñ kā palaT kar na aa.egā

vo vaqt peT pe patthar hī bāñdhne kā hai
ki jab zamīn pe hī ḳhandaqoñ kā mausam ho

ai mausam-e-gul tashvīsh na kar arbāb-e-ḳhirad kī bātoñ par
ye panja-e-vahshat mere haiñ har tār-e-garebāñ merā hai

shoḳhī-e-husn shahroñ meñ yuuñ al-amāñ
saath mausam ke badleñ sanam bhī nayā

mausam-e-barsāt hai aur vajd meñ haiñ lāla-zār
dushmanoñ ke vaar se chhalkā hai paimāna koī

koī bhī mausam aayā ho ham par to barsāt huī
us kī yādoñ ne jo gherā dopahroñ par chhā.ī raat

sukūñ-pazīr junūn-e-shabāb ho na sakā
shaguft-e-mausam-e-gul kāmyāb ho na sakā

ḳharāb mausam meñ har shajar se larazte pattoñ ne kyā kahā thā
ki phuul aane lage haiñ ab shāḳh par bahut der ba.ad jā kar

bahāreñ hoñ na hoñ phir bhī chaman ḳhālī nahīñ rahtā
ye mausam ġham kā mausam hai abhī tū nam na kar āñkheñ

sūraj kī tez dhuup kī zad meñ hai ab ye shahr
mausam kī ik hasīn sī añgḌā.ī chāhiye