Tags-Mausam

mausam sūkhe peḌ girāne vaalā thā
kisī kisī meñ phuul bhī aane vaalā thā

ḳhud apne-āp se milne kā maiñ apnā irāda huuñ
maiñ har mausam ko sah kar bhī abhī tak īstāda huuñ

kahāñ giraft meñ ab māh-o-sāl ke mausam
bikharte jaate haiñ tere visāl ke mausam

ki jaise zehn meñ ahd-e-ḳhizāñ utar aayā
bahut hī zard hue haiñ ḳhayāl ke mausam

tū apnī aañkh meñ tāb-e-bahār lā to sahī
jahān bhar meñ haiñ husn-o-jamāl ke mausam

maiñ Dūbtī huuñ kināroñ pe aur kahtī huuñ
kabhī na dekhe the aise zavāl ke mausam

har ek phuul kalī ko bulā rahā hai qarīb
chaman meñ aa.e haiñ ab ke kamāl ke mausam

tire javāb ke vaqfe tavīl kitne haiñ
guzarte jaate haiñ mere savāl ke mausam

ajab hai mausan-e-be-iḳhtiyārī
kī jab se vo hamārā ho gayā

ḳhvāb-e-tāza jagā.e āñkhoñ meñ
ham pe mausam kī ye navāzish kyoñ

phuul mausam kī nazar ho ga.e sab
jis ne paayā davām ḳhushbū hai

bunī haiñ sāzisheñ mausam ne dhuup se mil kar
havā ne mere har ik phuul ko ḳharāshā hai

aabrū rakh lo aaj mausam kī
mil gayā hai javāb āñkhoñ se

kushāda dast-o-bāzū ko jo patjhaḌ meñ bhī rakhte haiñ
parinde agle mausam ke unhī peḌoñ meñ aate haiñ

lamhoñ ke rañgīn ġhubāre haath se chhūTe jaate the
mausam dukh kā dard kī rut sab ānī-jānī lagtī thī

pyaar ke mausam kī ḳhushbū se ġhuncha ġhuncha mahkā thā
mahkī mahkī duniyā saarī raat kī raanī lagtī thī

jo mere dil kī ujaaḌ bastī meñ ek mausam Thahar gayā hai
balā se aa.e bahār yā phir ḳhizāñ ruteñ kyā shumār karnā

mausam bāheñ khol rahā hai
gadrā.ī hai shaam basantī

ye saarā hijr kā mausam ye saarī ḳhāna-vīrānī
ise ai zindagī mere junūñ ke naam likh denā

vo mausam jā chukā jis meñ parinde chahchahāte the
ab in peḌoñ kī shāḳhoñ par sukūt-e-shām likh denā