Tags-Maut

is ziist se ab maut badal jaa.e to achchhā
bechain hai dil jaan nikal jaa.e to achchhā

yuuñ maut ke muntazir haiñ 'bāqī'
mil jā.egā chain jaise mar ke

jab tabī.at kisī par aatī hai
maut ke din qarīb hote haiñ

maut un kā muñh hī taktī rah ga.ī
jo tirī furqat ke sadme sah ga.e

'shujā.a' maut se pahle zarūr jī lenā
ye kaam bhuul na jaanā baḌā zarūrī hai

jahāñ maut samjhūñ apnī vahīñ zindagī javāñ ho
koī rāsta na pā.ūñ maiñ tirī galī se aage

ḳhud-kushī ko udhār rakhte hue
maut kā intizār kar liyā jaa.e

maut ko dost banānā hī munāsib hai 'bashar'
zindagī kī to tamannā.ī hai saarī duniyā

sukūt meñ hai zamāne kī maut poshīda
hayāt vo hai jo har lahza iztirāb meñ hai

'bismil' kā rañj dil se bhulāyā na jā.egā
kis bekasī kī maut marā hai ki haa.e haa.e

tū nikaltā nahīñ shamshīr-ba-kaf ai qātil
maut mere liye talvār liye phirtī hai

kyā har maut ke liye zarūrī hotī haiñ
rukī huī sāñseñ pathrā.ī āñkheñ chaar kañdhe

vo log jo ro rahe haiñ mujh ko
ki maiñ ne ḳhud maut ko pukārā hai terī ḳhātir

mirā muqaddar ki aaj kī shab hai mujh ko hāsil ye terā paikar
mirā muqaddar ki maiñ ne ḳhud maut ko pukārā hai terī ḳhātir

yuuñ mirī qabr banā jaise shabistān-e-nashāt
maut kā jashn manā

maut agar jashn-e-mulāqāt hai aa jashn manā
ik sitāre ko janam de

urūs-e-maut se jaldī hai kis ko milne kī
qadam baḌhā huā ye sū-e-dār kis kā hai

vaqt par maut kī lazzat bhī nahīñ de paayā
mujh ko vo aadmī hiirā hī lagā thā pahle

maut se 'gauhar' Darnā kyā
maut to ik din aanī hai

tū merī zindagī se bhī katrā ke chal diyā
tujh ko to merī maut pe bhī iḳhtiyār thā