Tags-Maut

kitnī raushan kyuuñ na ho 'āzād' āḳhir ek din
sham-e-hastī maut ke jhoñkoñ se gul ho jā.egī

qahqahe kī maut hai yā maut kī āvāz hai
siskiyāñ letā huā ab zindagī kā saaz hai

raah meñ thak kar jahāñ baiThī agar ye zindagī
maut aa.ī baañh thāmī aur uThā kar le ga.ī

tujh par khuleñge maut kī sarhad ke rāste
himmat agar hai us kī galī se guzar ke dekh

vo dard de ki maut bhī jis kī davā na ho
is dil ko maut de jise achchhā kare koī

ye kis ḳhatā kī sazā meñ haiñ dohrī zanjīreñ
giraft maut kī hai zindagī kī qaid meñ huuñ

qatl karnā to us ko Thiik nahīñ
ishq kī maut hādse meñ ho

in añdherī rātoñ ke ḳhaufnāk sāyoñ se bach ke sub.h tak jī leñ
zahr dhuup kā chakh kar maut ko ziyā baḳhsheñ aao phir ġhazal kah leñ

thī zindagī ḳhudā kā ġhazab aur 'maz.harī'
maut ik ḳhudā kā pyaar hai le us kā pyaar dost

jaag uTThā thā sub.h maut kī niiñd se
raat aa.ī to martā huā maiñ hī thā

vo zindagī hai mohabbat ki jis ke zer-e-asar
nafas nafas meñ ho ik maut umr-bhar ke liye

ham ne saarī umr akele maut kā rasta dekhā hai
jab bhī aa.ī kisī bhī chaukhaT par sar rakh ke so leñge

jab vajūd kā rishta had pe maut kī pahuñche
paar us ke jaane meñ vaqt chāhiye kuchh to

jiinā aamne sāmne kā
maut meñ phir kas-bal kyā ho

sunā hai paas masīhā ke āftāb bhī hai
kareñge maut ke hiile se justujū-e-sharāb

aur gar tū bichhaḌ gayā mujh se
phir mirī jaan maut bhī kyā hai

āte-jāte har-nafas meñ maut kā thā zā.iqa
rā.egāñ jiine meñ marne kā hunar rakkhā gayā

phir hayāt-e-chand-roza kā ma.aal
maut par jab zindagī hai munhasir

bad-tar hai maut se bhī ġhulāmī kī zindagī
mar jā.iyo magar ye gavārā na kījiyo

maut ko ham zindagī kī tarjumāñ samjhā kiye
qatra-e-dariyā ko bahr-e-be-karāñ samjhā kiye