Tags-Maut

use phalāñg bhī gayā to is taraf ḳhabar nahīñ
adam ḳharāb-tar mile na maut ho na zindagī

dīvāna tire ruḳh kā aur maut se Dar jaa.e
jis dil meñ sadāqat ho mumkin nahīñ mar jaa.e

maut kahte haiñ jise zabt kā ye ḳhabt na ho
zindagī par bhī hai fariyād kā dhokā ham ko

aatī hai kis tarah se mire qabz-e-rūh ko
dekhūñ to maut DhūñD rahī hai bahāna kyā

ḳhalīl mast-e-mai-e-junūñ thā magar maiñ tum se ye pūchhtā huuñ
razā-e-haq kī chhurī ke nīche hayāt aa.ī kī maut aa.ī

maut kī bāteñ pyārī thiiñ
marne ko tayyār na the

is gunah par mirī ik umr añdhere meñ kaTī
mujh se is maut ke mele meñ charāġhāñ na huā

koī bas jaa.e jo tasavvur meñ
maut bhī zindagī se sharmā.e

maut bhī aa.ī to chehre par tabassum hī rahā
zabt par hai kis qadar ham ko bhī qudrat dekhiye

vo dil ho yā mirī guḌiyā kī maut ho jo ho
hamesha sog meñ chūlhā nahīñ jalātī maiñ

jo asāsa zindagī kā us ne joḌā umr bhar
maut kā sailāb jab aayā to sab kuchh bah gayā

kaise aa saktī hai aisī dil-nashīñ duniyā ko maut
kaun kahtā hai ki ye sab kuchh fanā ho jā.egā

ho ga.ī shahr shahr rusvā.ī
ai mirī maut tū bhalī aa.ī

dil ye kahtā hai vahāñ jā ke sambhal jā.ūñgā
maiñ ye kahtā huuñ ki bad-baḳht kī maut aa.ī hai

sitam se bhaag ke jiinā hai maut se bad-tar
barā-e-haq maiñ tujhe daar par chaḌhā milūñgā

jis ko kahte haiñ qazā yā maut jis kā naam hai
vāqa.ī vo dā.imī rāhat kā ik paiġhām hai

merī sazā-e-maut pe ik jashn thā bapā
vo shor thā ki merī fuġhāñ kaaT dī ga.ī

paañv phislā to giregī vo kisī daldal meñ
zindagī maut nahīñ hai ki sambhal jā.egī

jism kī ret bhī muTThī se phisal jā.egī
maut jab ruuh liye ghar se nikal jā.egī

kab tak yuuñ parde meñ husn mohabbat ko Thukrātā
maut kā din bhī hashr kā din hai chhupne vaalo sāmne aao