Tags-Mazdoor

ta.amīr-o-taraqqī vaale haiñ kahiye bhī to un ko kyā kahiye
jo shīsh-mahal meñ baiThe hue mazdūr kī bāteñ karte haiñ

terī tābish se raushan haiñ gul bhī aur vīrāne bhī
kyā tū bhī is hañstī-gātī duniyā kā mazdūr hai chāñd?

itnī jaldī mazdūr aurat āḳhir ye gale meñ bāñheñ kyuuñ
le der huī ab bhaag bhī jā bas itnī mohabbat kaafī hai

maiñ ne 'anvar' is liye bāñdhī kalā.ī par ghaḌī
vaqt pūchheñge ka.ī mazdūr bhī raste ke biich

le ke tesha uThā hai phir mazdūr
Dhal rahe haiñ jabal mashīnoñ meñ

vaqt mazdūr hai ujrat diije
ek ik lamhe kī qīmat diije

aaj se ai mazdūr kisāno mere giit tumhāre haiñ
fāqa-kash insāno mere jog-bahāg tumhāre haiñ

jaan ham kār-e-mohabbat kā sila chāhte the
dil-e-sāda koī mazdūr hai ujrat kaisī

ḳhvāhishoñ kī aaḌ meñ rutba javānī le ga.ī
pattharoñ ke Dher se mazdūr raanī le ga.ī

jab pasīne kā ḳharīdār na ho tab mazdūr
shaam ko nazreñ jhukā.e hue ghar jaate haiñ

merī zabāñ par maslahatoñ ke pahre haiñ to phir kyā hai
haq ke alam-bardār haiñ ab bhī mazdūr o dahqān mire

pahle bhī mayassar na thā mazdūr ko chhappar
ab naam pe dīvār ke ik TaaT rahā hai

is liye sab se alag hai mirī ḳhushbū 'āmī'
mushk-e-mazdūr pasīne meñ liye phirtā huuñ

saroñ pe oḌh ke mazdūr dhuup kī chādar
ḳhud apne sar pe use sā.ebāñ samajhne lage

zamām-e-kār agar mazdūr ke hāthoñ meñ ho phir kyā
tarīq-e-koh-kan meñ bhī vahī hiile haiñ parvezī

mujhe ḳhabar hai kyā kuchh hai buniyādoñ meñ
terī bastī kā pahlā mazdūr thā maiñ

zindagī ab is qadar saffāk ho jā.egī kyā
bhuuk hī mazdūr kī ḳhūrāk ho jā.egī kyā

daadī se kahnā us kī kahānī sunā.iye
jo bādshāh ishq meñ mazdūr ho gayā

hamāre shahr kā dastūr baabā
pareshāñ-hāl har mazdūr baabā