Tags-Mazdoor

ḳhvāb mazdūr hai
raat din sar pe bhārī taġhārī liye

aane vaale jaane vaale har zamāne ke liye
aadmī mazdūr hai rāheñ banāne ke liye

kabhī bār-e-ġham-e-firāq utaar
tū ne mazdūr kar diyā ham ko

aaj se ai mazdūr kisāno mere giit tumhāre haiñ
fāqa-kash insāno mere jog-bahāg tumhāre haiñ

maiñ vaqt-e-ḳhāna-e-mazdūr thā so
ba-taur-e-imtihāñ kaTtā rahā huuñ

peḌ ke nīche zarā sī chhāñv jo us ko milī
so gayā mazdūr tan par boriyā oḌhe hue

qasr-e-tan bigḌā kisī kā gorkan kī ban paḌī
ghar kisī kā gir paḌā ghar bin gayā mazdūr kā

jumbish-e-dil se hue haiñ uqda-hā-e-kār vā
kam-tarīñ mazdūr-e-sañgīñ-dast hai farhād yaañ

zindagī ik nā-ḳhalaf beTe kā baap
zindagī mazdūr kī bīmār maañ

hone do charāġhāñ mahloñ meñ kyā ham ko agar dīvālī hai
mazdūr haiñ ham mazdūr haiñ ham mazdūr kī duniyā kaalī hai

chaltī hai uThā kar tirī ḳhushbu-e-badan ko
merī to har ik saañs hai mazdūr minal-ishq

haqq-e-mehnat un ġharīboñ kā samajhte gar amiir
apne rahne kā makāñ de Dālte mazdūr ko

ta.amīr-o-taraqqī vaale haiñ kahiye bhī to un ko kyā kahiye
jo shīsh-mahal meñ baiThe hue mazdūr kī bāteñ karte haiñ

banda-e-mazdūr ko jā kar mirā paiġhām de
ḳhizr kā paiġhām kyā hai ye payām-e-kā.enāt

ba-īñ rindī 'majāz' ik shā.er-e-mazdūr-o-dahqāñ hai
agar shahroñ meñ vo bad-nām hai bad-nām rahne de

haa.e vo mazdūr jis ke paa.e himmat par nisār
sañg-dil sarmāya-dārī kā sar-e-nā-pā.edār

zamām-e-kār agar mazdūr ke hāthoñ meñ ho phir kyā
tarīq-e-koh-kan meñ bhī vahī hiile haiñ parvezī

ajiib tesha hai mazdūr kā pasīna bhī
pahāḌ kaaT ke rāsta kaThin nikāltā hai