Tags-Mehfil

ġhazab thī kasrat-e-mahfil ki maiñ ne dhoke meñ
hazār baar raqīboñ ko ham-kanār kiyā

jāgte rahte haiñ dil kī mahfil-e-ḳhāmosh meñ
band kar lete haiñ āñkheñ nutq ke āġhosh meñ

jin ke asrār-e-daraḳhshāñ ruuh kī mahfil meñ haiñ
sīpiyāñ haiñ nutq kī maujoñ pe motī dil meñ haiñ

jaate jaate bhī to ham ko ik ziist kā unvāñ de ke gayā
bujhtī huī sham-e-mahfil ko phir sho.ala-e-raqsāñ de ke gayā

mast rahtā hai magar ab bhī dil-e-ḳhāna-ḳharāb
shaam ko baiTh ke mahfil meñ luñDhātā huuñ sharāb

siskiyāñ bhartī hai to añgḌā.iyāñ letī hai to
uf ai makkāra bharī mahfil ko jal detī hai tū

tamannā hai ki sarsayyad banūñ yā 'shiblī'-o-'hālī'
ki in arbāb-e-mahfil kī abhī tak hai jagah ḳhālī

kashtī-e-mai le ke ai saaqī pahuñch bahr-e-ḳhudā
be tire mahfil meñ dariyā-bār āñkheñ ho ga.iiñ

ham ne 'rāsiḳh' tujhe mahfil meñ bahut yaad kiyā
us ne pūchhā thā koī tufta-jigar hai ki nahīñ

samājī mashġhaloñ meñ yā to haiñ shādī kī taqrībeñ
nahīñ to mahfil-e-mīlād vo majlis niyāz aur nazreñ

har ik mahfil meñ hotī hai yahāñ hañgāma-ārā.ī
ki achchhe achchhe ilm-o-fan bante haiñ saudā.ī

mahfil mahfil jis ke charche gulshan gulshan jai-jai-kār
ham ne usī ke haath meñ yaaro aksar ḳhanjar dekhā hai

jo bharī mahfil meñ nazroñ kī huī hai guftugū
husn ko ma.alūm hai yā ishq ko ma.alūm hai

go sham.a huuñ pa mahfil-e-jānāñ se duur huuñ
maiñ andalīb huuñ pa gulistāñ se duur huuñ

charāġh-e-yās-o-hasrat ham haiñ mahfil meñ hasīnoñ kī
jalā.e jis kā jī chāhe bujhā.e jis kā jī chāhe

saarī mahfil ko ishāroñ meñ luTā do ai jaan
siikh lo chashm-e-suḳhan-go se latīfa kahnā

bulā ke mujh ko nikālā hai apnī mahfil se
vo nekiyāñ nahīñ achchhī haiñ jo ho badī ke liye

partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām