Tags-Mehfil

charāġhoñ kī safeñ suunī paḌī haiñ
hamāre ba.ad mahfil meñ rahā kyā

'saif' yuuñ chhoḌ chale ho mahfil
jaise vo yaad na ā.eñge tumheñ

ye aur baat ki tum ko maiñ yaad aa na sakā
vagarna aaj bhī mahfil meñ har zabāñ par huuñ

taġhāful kī koī had bhī to honī chāhiye āḳhir
bil-āḳhir bin bulā.e ham tirī mahfil meñ aa.e haiñ

uTThe jis bazm se tum ġham kā samāñ chhoḌ aa.e
diye mahfil se uThā laa.e dhuāñ chhoḌ aa.e

aisī mahfil meñ shirkat se kyā fā.eda aise logoñ se koī tavaqqo.a bhī kyā
jo kahā jaa.e ḳhāmosh sunte raho lab-kushā.ī kī qat.an ijāzat nahīñ

jab se aayā huuñ yahāñ mohr-ba-lab baiThā huuñ
mujh ko mahfil meñ bulāne kī zarūrat kyā thī

raat mahfil meñ vo be-naqāb aa.e the
aur ham ne ye samjhā sahar ho ga.ī

badal ga.e zindagī ke mehvar tavāf-e-dair-o-haram kahāñ kā
tumhārī mahfil agar ho baaqī to maiñ bhī parvāna-vār aa.uuñ

'hālī' uTThā hilā ke mahfil ko
āḳhir apnā kahā kiyā tū ne

jale haiñ dil na charāġhoñ ne raushnī kī hai
vo shab-parastoñ ne mahfil meñ tīrgī kī hai

ye uThnā baiThnā mahfil meñ un kā rañg lā.egā
qayāmat ban ke uTTheñge bhabūkā ban ke baiThe haiñ

ek malāl kā sā haal mahv thā apne haal meñ
raqs-o-navā the be-taraf mahfil-e-shab bapā bhī thī

har mai-kash kī zehnī laġhzish is mehvar par ghuum rahī hai
jaise vo sambhlā baiThā hai jaise mahfil jhuum rahī hai

raaz na pūchho mustaqbil kā sher-o-suḳhan kī is mahfil kā
sāhab-e-fan zulmat meñ paḌe haiñ duur charāġh-e-fan jaltā hai

mahfil meñ terī aa ke ye be-ābrū hue
pahle the aap aap se tum tum se tū hue

tujhe dānista mahfil meñ jo dekhā ho to mujrim huuñ
nazar āḳhir nazar hai be-irāda uTh ga.ī hogī

qad o gesū lab-o-ruḳhsār ke afsāne chale
aaj mahfil meñ tire naam pe paimāne chale

rañg rah rah ke tire ruḳh kā uḌā jaatā hai
varna maiñ aur tirī mahfil-e-tamkīñ se uThūñ

zabt-e-dil par bhī us kī mahfil meñ
apnā rūmāl ashk se tar thā