Tags-Mehfil

mahfil meñ un kī sham.a jalī hai ki jān-o-dil
khultā hai kab ye rāz-e-nihāñ dekhte raho

har ek manzar har ek ḳhalvat gañvā chuke haiñ
ham ek mahfil kī yaad par inhisār kar ke

TuuT kar mai pe yuuñ girī tauba
jaise parvāna sham-e-mahfil par

to āḳhir sāz-e-hastī kyuuñ tarab-āhañg-e-mahfil thā
nashāt-ā.īn kaif-e-be-dilī yārab agar dil thā

duur terī mahfil se raat din sulagtā huuñ
tū mirī tamannā hai maiñ tirā tamāshā huuñ

ye aur baat bulā.eñ na apnī mahfil meñ
magar 'ziyā' ko bhulānā koī mazāq nahīñ

'razā' ye mahfil to sard hī hotī jā rahī hai
kahāñ haiñ sham.eñ vo sho.ala-sāmāniyāñ kahāñ haiñ

aaj to mahfil-e-yārāñ pe ho maġhrūr bahut
jab kabhī TuuT ke bikhroge to yaad ā.ūñgā

na kar deñ mujh ko majbūr-e-navā firdaus meñ hūreñ
mirā soz-e-darūñ phir garmi-e-mahfil na ban jaa.e

duur baiThe haiñ mirī mahfil se
vaj.h-e-āzār samajhte haiñ mujhe

hosh to pahle hī kho aa.e the us mahfil meñ
ab agar jaa.eñ to phir dil bhī gayā rakkhā hai

zindān-e-kā.enāt meñ mahsūr kar diyā
mahfil se apnī tum ne bahut duur kar diyā

kahāñ mumkin kisī ko bāryābī un kī mahfil meñ
na itmīnān-e-koshish hai na ummīd-e-sifārish hai

ek maqtal thī mahfil-e-yārāñ
ham hī zulmat ko samjhe nuur miyāñ

sunā hai husn kī mahfil meñ pyaar biktā hai
kaho ki ishq bhī dāman ke taar le ke chale

phir zabān-e-ishq chashm-e-ḳhūñfishāñ hone lagī
phir hadīs-e-dil sar-e-mahfil bayāñ hone lagī

idhar bhī uThtī hai arbāb-e-anjuman kī nazar
kuchh aap hī nahīñ mahfil meñ merī zaat bhī hai

māshūqoñ ke dahne baa.eñ to ushshāq kā majma.a rahtā hai
dekhī na anādil se ham ne mahfil kabhī ḳhālī phūloñ kī

chup jo rahtā huuñ to huuñ barsar-e-mahfil mujrim
arz kartā huuñ to sarkār pe harf aatā hai

uThne hī ko hai beach se parda hijāb kā
mahfil tamām ālam-e-tasvīr ho na jaa.e