Tags-Mehfil

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

jo bharī mahfil ke dil meñ raushnī phailā ga.ī
vo ḳhafā hai aaj tak merī isī taqrīr par

mai-kashoñ meñ na sahī tishna-laboñ meñ hī sahī
koī gosha tirī mahfil meñ hamārā bhī to ho

ham to āvāra-e-sahrā haiñ hameñ kyā matlab
un kī mahfil meñ junūñ kī koī tauqīr sahī

jis ko duniyā meñ kisī ne muñh lagāyā hī nahīñ
mahfil-e-rindāñ meñ haiñ TuuTā huā paimāna ham

kaash koī dekh hī letā nigāh-e-lutf se
aa.e the mahfil meñ 'jāmī' kitne mushtāqāna ham

dahakne do abhī dāġhoñ se mahfil
chhalakne do abhī paimāna-e-ġham

garebāñ phaaḌ kar 'jumbish' chalo phūloñ kī mahfil meñ
ye sahrā hai yahāñ hāl-e-pareshāñ kaun dekhegā

chalo 'arsh' mahfil-e-dost meñ ki payām-e-dost bhī hai yahī
vo jo hādisa thā firāq kā sar-e-dushmanāñ se guzar gayā

tirī mahfil meñ aatā huuñ pahan kar dhuup kā chashma
nazar tujh par Tikāne ke bahāne DhūñD letā huuñ

tapish patiñgoñ ko baḳhsh deñge lahū charāġhoñ meñ Dhaal deñge
ham un kī mahfil meñ rah ga.e haiñ to un kī mahfil sambhāl deñge

kyā kaheñ mahfil se terī kyā uThā kar le ga.e
ham matā-e-dard ko tanhā uThā kar le ga.e

saath haiñ mere buzurgoñ kī duā.eñ itnī
maiñ huuñ mahfil tū mujhe pal ko bhī tanhā na samajh

mahfil-e-yār meñ ba-zauq-e-nigāh
lutf kyā kyā uThā ga.iiñ āñkheñ

mahfil meñ log chauñk paḌe mere naam par
tum muskurā diye mirī qīmat yahī to hai

mahfil par jab niiñd sī chhā.ī sab ke sab ḳhāmosh hue
ham ne tab kuchh sher sunāyā logoñ ko bedār kiyā

ġham-e-hijrāñ se zarā yuuñ bhī nibhā.ī jaa.e
mahfil-e-ġhair sahī aaj sajā.ī jaa.e

maiñ vo TuuTā huā taarā jise mahfil na raas aa.ī
maiñ vo shola jo shab bhar aañkh ke paanī meñ rahtā hai

arzāñ hai bahut ḳhuun farozāñ hai bahut shaam
kyā apnī hī mahfil meñ charāġhāñ na karoge

hai tasavvur ishrat-e-māzī kā ā.īna-ba-dast
dil vahī dil hai magar vo garmī-e-mahfil nahīñ