Tags-Mehfil

ma.āz-allāh terā husn terī bazm-e-ishrat meñ
ye vo mahfil hai jis meñ sham.a ko parvāna kahte haiñ

ġhair ke dam se hai raunaq bhī charāġhāñ bhī 'vasī'
terī mahfil meñ agar sabz-qadam haiñ ham haiñ

chashm-e-sāqī ke alāva jām-e-ḳhālī ke sivā
kaun apnā āshnā aġhyār kī mahfil meñ thā

'nādir' is mahfil meñ haiñ vo naam ke sadr-anjuman
aap ko kahnā ho jo kuchh ahl-e-majlis se kaheñ

har ik hai mahv-e-hairat vo karishma-sāz hai aisā
sar-e-mahfil jo ik rañgīñ nazāra chhoḌ jaatā hai

jo apnī chashm-e-tar se dil kā paara chhoḌ jaatā hai
vahī mahfil meñ ġham kā isti.āra chhoḌ jaatā hai

mere hī dam se terī mahfil kā
jo bhī zarra hai jān-e-ālam hai

kamre meñ aa ke baiThā huuñ apne bujhā bujhā
jal jal ke terī mahfil-e-raqs-o-surūd se

ham hote haiñ jab mahfil meñ
tū jān-e-mahfil hotā hai

vasl meñ ḳhālī huī ġhair se mahfil to kyā
sharm bhī jaa.e to maiñ jānūñ ki tanhā.ī huī

mahfil-e-ġham meñ ziyā to hogī
dil jaleñge to jilā to hogī

har ek mahfil paḌī hai suunī tamām mele bichhaḌ chuke haiñ
sitamgaroñ kī sitam-shi.āroñ kī yaad sī rah ga.ī hai baaqī

bujh ga.ī sham.a kaTī raat ga.ī sab mahfil
ab akele hī kaTegā safar-e-parvāna

vo dil se tañg aa ke aaj mahfil meñ husn kī tamkanat kī ḳhātir
nazar bachānā bhī chāhte haiñ nazar milānā bhī chāhte haiñ

sham-o-gul ne saj to dī mahfil tirī tere baġhair
vo rahī apnī jagah jo thī kamī tere baġhair

to phir ikrām kyā shai hai jo tanhā.ī meñ tanhā huuñ
koī mahfil atā kar qā.ede kī us meñ tanhā kar

ye rañg-e-bahār-e-ālam hai kyuuñ fikr hai tujh ko ai saaqī
mahfil to tirī suunī na huī kuchh uTh bhī ga.e kuchh aa bhī ga.e

is mahfil-e-kaif-o-mastī meñ is anjuman-e-irfānī meñ
sab jām-ba-kaf baiThe hī rahe ham pī bhī ga.e chhalkā bhī ga.e

kahīñ sarmāya-e-mahfil thī merī garm-guftārī
kahīñ sab ko pareshāñ kar ga.ī merī kam-āmezī

rañg-e-mahfil meñ nazar aatā hai ik rañg-e-digar
terī mahfil ke sivā bhī kuchh tirī mahfil meñ hai