Tags-Mehfil

'nabīl' āvāz bhī apnī kahāñ thī muddatoñ se
jo tum aa.e to ham yak-laḳht mahfil ho ga.e haiñ

faqat ik jurm-e-haq-goī ke chalte terī mahfil meñ
tire 'āsif' kī mastī mojib-e-tāzīr hai saaqī

bharam us kā hī ai mansūr tū ne rakh liyā hotā
kisī kā raaz ai nādāñ sar-e-mahfil nahīñ kahte

harīm-e-nāz ko ham ġhair kī mahfil nahīñ kahte
raqīboñ par magar vo kaun thā maa.il nahīñ kahte

yaktā.ī kā da.avā to bahut kuchh hai mirī jaan
kyā ho jo koī aa.ina mahfil meñ dikhā de

aao dekheñ ahl-e-vafā kī hotī hai tauqīr kahāñ
kis mahfil kā naam hai maqtal khiñchtī hai shamshīr kahāñ

zindagī mahfil-e-shab kī thī pas-andāz-e-sharāb
piine baiThe to bas ik ghūñT zarā sā niklā

na ro.e tā koī āshiq ye hukm hai us kā
ki sham.a bhī mirī mahfil meñ ashk-bār na ho

yūñhī shab bhar jalā karte the yād-e-sho.ala-e-ruḳh meñ
yahī sozish kabhī ai sham-e-mahfil ham bhī rakhte the

alag tū bazm se uTh kar jo sun letā to kah dete
ki kuchh kuchh iltijā ai zeb-e-mahfil ham bhī rakhte the

jaag ai sham-e-shabistān-e-visāl
mahfil-e-ḳhvāb ke is farsh-e-tarab-nāk se jaag!

ham ġhaur kar rahe haiñ to mahfil hai fikr meñ
uThnā na chāhiye ki uThānā na chāhiye

udaas dekh ke mahfil ko merī kahte haiñ
yahāñ bhī koī musībat kā mubtalā kyā hai

rone se hayā sham.a kī zāhir ho to kyuuñ kar
uryāñ hai magar beach meñ mahfil ke khaḌī hai

unhī pe tohmat-e-dīvāngī lagāte ho
jo ittifāq se mahfil meñ rū-shanās bhī haiñ

sunā.ūñ kyā maiñ apnī dāstān-e-ġham tujhe hamdam
vo aayā apnī mahfil meñ magar begāna-vār aayā

ye kaun sā aalam hai afsurda-mizājī kā
gulshan meñ bhī vīrānī mahfil meñ bhī tanhā.ī

terī mahfil meñ jitne ai sitam-gar jaane vaale haiñ
hamīñ haiñ ek un meñ jo tirā ġham khāne vaale haiñ

huī sahar ḳhatm par hai mahfil uTho ki 'afsar' uchāT hai dil
na husn meñ ab vo dilkashī hai na zulf meñ ab vo hal rahe haiñ

tumhārī mahfil meñ aane vaale unhī mohabbat ke dushmanoñ ne
tumhārā merā jo vāqi.a thā use fasāna banā rakhā hai