Tags-Mehfil

kyā zabāñ par hai kisī kī kyā kisī ke dil meñ hai
jis kī mahfil hai vahī jaane vo jis mushkil meñ hai

mirā dil bhī muamma ho gayā hai
bharī-mahfil meñ tanhā ho gayā hai

tārīk ho na jaa.e kahīñ mahfil-e-hayāt
ab āñdhiyoñ kā zor hai sham-e-hayāt par

aaj mahfil se tirī uTThā huuñ shā.er ho kar
terī āñkhoñ se liye ek ġhazal jaatā huuñ

kyā shai atā-e-ġham kī hai kaifiyyat ai 'sahāb'
ḳhalvat harīm-e-dil meñ hai mahfil nazar meñ hai

haath phailāyā na jā.egā bharī mahfil meñ aaj
sabr kī daulat ko saaqī rā.egāñ kyuuñ kar kareñ

maiñ ḳhayāloñ ke parī-ḳhānoñ meñ lahrāyā huuñ
mujh ko bechārgī-e-mahfil-e-shab yaad nahīñ

ḳhāk-e-parvāna dam-e-sub.h uḌī jaatī hai
khul na jaa.e kahīñ mahfil ke charāġhoñ kā bharam

ajiib hote haiñ ādāb-e-ruḳhsat-e-mahfil
ki vo bhī uTh ke gayā jis kā ghar na thā koī

raushan haiñ dil ke daaġh na āñkhoñ ke shab-charāġh
kyuuñ shaam hī se bujh ga.e mahfil ke sab charāġh

aap ko yaad aa ga.iiñ haiñ kis kī bazm-ārā.iyāñ
hazrat-e-dil kahiye to qasd aaj kis mahfil kā hai

mirī ġhairat bhī koī shai hai ki mahfil meñ mujhe
us ne is tarah bulāyā hai ki jā bhī na sakūñ

jaate jaate bhī to ham ko ik ziist kā unvāñ de ke gayā
bujhtī huī sham-e-mahfil ko phir sho.ala-e-raqsāñ de ke gayā

mahfil se hī uTh jā.eñge ham aise qabā-chāk
vahshat kā hamārī kabhī shikvā na karoge

ġham ke mehvar pe haiñ Thahre hue aflāk-o-nujūm
merī mahfil meñ nahīñ vaqt ko baar aaj kī raat

aaj thā raunaq-e-mahfil 'ālī'
tum na hote to vo paḌhtā kyā kyā

kis ko samjhā.eñ ki us mahfil meñ
kaise hotā hai taqāzā kyā kyā

ga.ī jidhar se vo mad.hosh ho ga.ī mahfil
magar vo shoḳh nazar hoshiyār guzrī hai

shab kī shab mahfil meñ koī ḳhush-kalām aayā to kyā
tyaag dī jo bazm us meñ merā naam aayā to kyā

ka.aba-o-dair kī rāhoñ se guzar jaatā huuñ
mahfil-e-nāz ke ādāb kahāñ se lā.ūñ