Tags-Mehfil

mahfil-e-hāl meñ kal mazī-o-mustaqbil aa.e
aur kahā marsiya-ḳhvānī ke liye aa.e haiñ

kuchh nahīñ yaad ki shab raqs kī mahfil meñ 'zafar'
ham judā kis se hue kis se baġhal-gīr hue

hoshyār rahe ḳhirad kī mahfil
ik ḳhāna-ḳharāb aa rahā hai

ye chāñd-sitāroñ kī mahfil ma.alūm nahīñ kab raushan ho
tum paas raho tum saath raho jazboñ meñ kasak aa jā.egī

apnī mahfil se abas ham ko uThāte haiñ huzūr
chupke baiThe haiñ alag aap kā kyā lete haiñ

apnā apnā ye muqaddar hai kahūñ kyā vaa.iz
mahfil-e-va.az tujhe mahfil-e-rindāñ mujh ko

kyā fikr-e-bahār o mahfil-e-yār
ab ḳhatm vo baab ho gayā hai

mahfil-e-nāz ho ki dār-o-rasan
har taraf kāmyāb haiñ ham log

ham to āvāra-e-sahrā haiñ hameñ kyā matlab
un kī mahfil meñ junūñ kī koī tauqīr sahī

ġhair leñ mahfil meñ bose jaam ke
ham raheñ yuuñ tishna-lab paiġhām ke

qissa-e-dār-o-rasan yā qissa-e-gesū-o-qad
kuchh to chheḌo vaqt bhī hai rañg par mahfil bhī hai

yahī thā vaqf tirī mahfil-e-tarab ke liye
charāġh-e-dil ki sulagtā hai aaj sab ke liye

kitnā saj-dhaj kar mahfil meñ aayā huuñ
merī vahshat ghar par rakkhī huī hai dost

mahfil-e-māh-vashāñ meñ to ġhazal ho na sakī
bazm-e-āshufta-sarāñ ho to ġhazal hotī hai

khul jaa.e na āñkhoñ se kahīñ rāz-e-mohabbat
achchhā hai ki tum ḳhud mujhe mahfil se uThā do

uThāo aañkh na sharmāo ye to mahfil hai
ġhazab se jānib-e-aġhyār dekhte jaao

mahfil meñ us ne ġhair ko pahlū meñ dī jagah
guzrī jo dil pe kyā kaheñ 'bismil' kisī se ham

DhūñDhtī haiñ vo munfa.il nazreñ
daad mahfil se uTh ke paa.ī hai

tanhā.ī jalva-gāh-e-tahayyur hai aur tum
vīrāniyoñ ke raqs ko mahfil samajhte ho