Tags-Mehfil

saiñkaḌoñ sajdoñ meñ vaa.iz ko huā hai hāsil
zīnat-e-mahfil-e-arbāb-e-riyā ho jaanā

pighal rahe haiñ jahāñ log sho.ala-e-jāñ se
sharīk maiñ bhī isī mahfil-e-hunar meñ huuñ

yaar kī mahfil sajī mai kī mahak chhāne lagī
zehn-o-dil meñ ye kahāñ se raushnī aane lagī

mahfileñ aur bhī haiñ husn-o-adā kī lekin
terī mahfil kī tarah ab koī mahfil to nahīñ

sajī huī hai adab kī mahfil haal ke aise naġhmoñ se
be-maqsad be-kaif kitābeñ husn-e-taḳhlīqāt ke naam

mahfil meñ us shaḳhs ke hote kaif kahāñ se aatā hai
paimāne se āñkhoñ meñ yā āñkhoñ se paimāne meñ

jalva-gar bazm-e-hasīnāñ meñ haiñ vo is shaan se
chāñd jaise ai 'qamar' tāroñ bharī mahfil meñ hai

tū na hogā to kahāñ jā ke jalūñgā shab bhar
tujh se hī garmi-e-mahfil hai mirā saath na chhoḌ

ye jo har sū tīrgī bikhrī huī hai is qadar
kyā tirī mahfil meñ ab tak 'bhāskar' aayā nahīñ

bharī mahfil meñ un ko chheḌne kī kyā zarūrat thī
janāb-e-nūh tum sā bhī na koī be-adab hogā

jo saa.e duur charāġhoñ ke gird larzāñ haiñ
na jaane mahfil-e-ġham hai ki bazm-e-jām-o-subū

qarīb-e-āḳhir-e-shab ḳhatm ho ga.ī mahfil
aur is ke saath dhuāñ bhī charāġh meñ aayā

bahut udaas hai dil dostoñ kī mahfil meñ
har ek aañkh meñ chehra-numā hai tanhā.ī

kuchh ishārāt-e-nihāñ hoñ to nigāh-e-nāz ke
bhāñp leñge ham ye mahfil rashk-e-ḳhalvat bhī to ho

dhokā thā nigāhoñ kā magar ḳhuub thā dhokā
mujh ko tirī nazroñ meñ mohabbat nazar aa.ī

fareb-e-sāqi-e-mahfil na pūchhiye 'majrūh'
sharāb ek hai badle hue haiñ paimāne

'hayāt' kuchh to kaho dostoñ kī mahfil meñ
ġhamoñ kī bhiiḌ meñ apne bhī ġham nikharte haiñ

aur ik nāra-e-mastāna ki mahfil jaage
aur ik jaam zamāne ko ḳhabar hone tak

tere naqsh-e-qadam bhī mile jā-ba-jā terī mahfil tirā āstāñ bhī milā
haañ magar tū kisī ko nahīñ mil sakā ho ke nākām har justujū rah ga.ī