Tags-Mehfil

mahfil bhī nūr-bār hai saaqī bhī ḳhum ba-dosh
mere hī naav nosh kā meyār ghaT gayā

us ne jab darvāza mujh par band kiyā
mujh par us kī mahfil ke ādāb khule

nāzish-e-dahr na thā maiñ to pas-e-murdan kyuuñ
mahfil-e-ġhair meñ sau baar mirā naam aayā

terī mahfil kā yaar kyā kahnā
ham bhī nikle haiñ chashm-e-tar le kar

maiñ jāntā thā hogī na mujh par nazar kabhī
mahfil meñ un kī phir bhī barābar gayā huuñ maiñ

charāġh ghar kā ho mahfil kā ho ki mandir kā
havā ke paas koī maslahat nahīñ hotī

bharī mahfil meñ rusvā ho ga.e the
hamī ghar ghar kā charchā ho ga.e the

maiñ us mahfil kī raushan sā.atoñ ko chhoḌ kar gum huuñ
ab itnī raat ko darvāza apnā kaun kholegā

maiñ apne hisse kī tanhā.ī mahfil se nikālūñgā
jo lā-hāsil zarūrī hai to hāsil se nikālūñgā

ahd-e-hāzir ke na.e 'mīr' vahāñ hoñge 'habāb'
mujh ko mahfil meñ na le jaao suḳhan-dānoñ kī

dil-e-vahshī ke bahalne kā nahīñ ek bhī sāmān yahāñ
mahfil-e-zohd-e-mizājāñ se ye bezār huā chāhtā hai

dhīmā dhīmā sā nuur jaise tah-e-sāz
baḌhtā jaatā hai chhaTke tāroñ kā gudāz

sulūk-e-yār se dil Dūbne lagā hai 'farāz'
magar ye mahfil-e-ādā hai kyā kiyā jaa.e

bhare haiñ tujh meñ vo lākhoñ hunar ai majma-e-ḳhūbī
mulāqātī tirā goyā bharī mahfil se miltā hai

guloñ kī mahfil-e-rañgīñ meñ ḳhaar ban na sake
bahār aa.ī to ham gulsitāñ se lauT aa.e

apnī apnī zaat meñ gum haiñ ahl-e-dil bhī ahl-e-nazar bhī
mahfil meñ dil kyūñkar bahle mahfil meñ tanhā.ī bahut hai

ye namī āñkhoñ kī siine kī jalan jaatī nahīñ
terī mahfil meñ bhī tanhā.ī se ghabrāte haiñ ham

be-dād kī mahfil meñ sazā-vār hamīñ the
taqsīr kisī kī ho gunahgār hamīñ the

un kī mahfil meñ dil-e-pur-iztirāb
ek sho.ala thā jo tharrātā rahā

jahāñ par ḳhushbueñ thiiñ zindagī kī
usī mahfil meñ ab ġhībat bahut hai