Tags-Mehfil

nikle tirī mahfil se to saath na thā koī
shāyad mirī rusvā.ī kuchh duur chalī hogī

kahīñ ik riñd aur vāmāñda-e-afkār tanhā.ī
kahīñ mahfil kī mahfil taur se be-taur hai saaqī

be-zārī se apnā apnā jaam liye
baiThā hai mahfil meñ har mai-ḳhvār judā

mahfil-ārā the magar phir kam-numā hote ga.e
dekhte hī dekhte ham kyā se kyā hote ga.e

ham vafā-keshoñ kā īmāñ bhī hai parvāna-sifat
sham-e-mahfil jo vo kāfir na rahā aur sahī

is mahfil meñ maiñ bhī kyā bebāk huā
aib o hunar kā saarā parda chaak huā

jo havāle se mire mahfil meñ pahchāne ga.e
zikr par mere unhī logoñ ke tevar dekhnā

der tak hinsā thā maiñ dostoñ kī mahfil meñ
lauT kar na jaane kyuuñ dil dukhā huā paayā

milā lutf-e-suḳhan kyā ḳhaak ham ko us kī mahfil meñ
ki chup baiThe rahe juuñ naqsh-e-dīvār ik kināre ham

hamāre saa.e se bachtā hai har ik bazm meñ us kī
hameñ dekho ki ham tanhā bharī mahfil meñ rahte haiñ

vo jo anjān haiñ mahfil meñ to apnā bhī salām
ham bhī milte nahīñ is taur ke an-jānoñ se

ik ġhazal kyā sunā dī mahfil meñ
bā-ḳhudā rah ga.e sabhī hil ke

udū ḳhush hoñ to hoñ ai be-muravvat terī mahfil meñ
mirā to haal ye hai jab kabhī aayā yahāñ royā

kyā dil hai ki ik saañs bhī ārām na le hai
mahfil se jo nikle hai to ḳhalvat meñ jale hai

mahfil meñ tum aġhyār ko duz-dīda nazar se
manzūr hai pinhāñ na rahe raaz to dekho

ik hasīñ kā aa gayā jo tazkira
der tak mahfil meñ zikr-e-hūr thā

kuchh baiTh gayā dil hī yahāñ baiTh ke apnā
ġhairat tirī mahfil se ab uThvā.egī kis ko

bazm-e-tarab bhī sajī mahfil-e-ġham bhī sajī
kaun milā thā mujhe kaun judā ho gayā

tumhārī mahfil se jā rahā huuñ mujhe duāoñ meñ yaad rakhnā
ai mere yaaro lo maiñ chalā huuñ mujhe duāoñ meñ yaad rakhnā

vo kyuuñ uTh ke ḳhalvat se mahfil meñ aa.eñ
vo kyā jāneñ kyā mudda.ā hai kisī kā