Tags-Mehfil

ġham ke sāñche meñ ik ik nafas Dhal gayā un kī mahfil meñ ye daur bhī chal gayā
ashk piine se maanā ki dil jal gayā zabt-e-ġham kī magar aabrū rah ga.ī

mahfil meñ un kī khul gayā dil kā muāmla
palkoñ pe ashk rah ga.e piine ke ba.ad bhī

mahfil meñ kis ne aap ko dil meñ chhupā liyā
itnoñ meñ kaun chor hai pahchān jā.iye

mahfil meñ is parī kī jo ye dil-jalā na ho
yārab sharāb-e-nāb meñ hī kuchh mazā na ho

hujūm-e-ġham hai qalb ġham-zada hai
mirī mahfil mirā ḳhalvat-kada hai

log mahfil meñ bulāte hue katrāte the
ab nahīñ dhaḌkā ye ḳhud se ki kahāñ kyā kar aa.eñ

mahfil meñ to suniye havas-e-jāh pe taqrīr
pahlū meñ yahī ḳhaar khaTaktā bhī bahut hai

ik dil-e-dīvāna thā jaatā rahā jaane bhī do
ye kaho kyuuñ āj-kal sī raunaq-e-mahfil nahīñ

sham-e-mahfil ho ke bhī girvīda-e-mahfil nahīñ
maiñ huuñ duniyā meñ magar duniyā meñ merā dil nahīñ

saarī mahfil laḌkhaḌātī rah ga.ī
mast āñkhoñ se pilā kar chal diye

balā kī ḳhāmushī taarī thī har-sū terī haibat se
sar-e-mahfil jo gūñjā nāra-e-mastāna merā thā

ajab bismil hai 'ishrat' apne qātil se ye kahtā hai
sar-e-mahfil tujhe ai jān-e-mahfil chāhtā huuñ maiñ

ik shaam sar-e-mahfil ham ne bhī use dekhā
ye sach hai un āñkhoñ meñ mai-ḳhāne machalte the

sūrat-e-parvāna huuñ maiñ bazm meñ
mujh ko tū ai sham-e-mahfil luuT le

aaj to muuD hai mahfil bhī hai 'mohsin'-sāhab
aaj añgūr ke paanī kā maza aa.egā

husn kī āzādiyoñ kā zikr kyā
husn agar chāhe to mahfil luuT le

raqīboñ se sargarm hai un kī mahfil
faqat 'nūr' hai duur us anjuman se

us vaqt khulegā his ko bhī ehsās-e-mohabbat hai ki nahīñ
jab sham.a sar-e-mahfil ro kar muñh dekhegī parvāne kā

diloñ kā soz tire rū-e-be-naqāb kī aañch
tamām garmī-e-mahfil tire shabāb kī aañch

hazāroñ daaġh haiñ dil meñ jigar meñ lākhoñ zaḳhm
'riyāz' mahfil-e-ḳhūbāñ se phūl-phal ke chale