Tags-Mehfil

mahfil meñ naam us kā pukārā gayā thā aur
sab log the ki merī taraf dekhne lage

diida tā-dil hai yāk-ā.īna charāġhāñ kis ne
ḳhalvat-e-nāz pe pairāya-e-mahfil bāñdhā

ho gayā mahv-e-tamāshā ġhair kī mahfil meñ kyuuñ
ġhair tere dil mirā jyuuñ shīsha vaqf-e-sañg thā

husn to hai ik tajallī sham-e-har-mahfil-sifat
vo to kah degā ye ik andāz-e-māshūqāna thā

jalāo ḳhūn-e-dil mahfil meñ jab kuchh raushnī hogī
añdherā har taraf chhāyā huā hai bazm-e-jānāñ ke

un kī mahfil se uTh ke aa to ga.e
sochte haiñ ki ab kidhar jaa.eñ

bahār laayā hai sāġhar-e-gul bhare haiñ goyā piyāla-e-mul
nahīñ hai mahfil meñ shor-e-qulqul chaman meñ bulbul chahak rahī hai

kahūñ maiñ fiqara vo hai hañsī kā charāġh-e-mahfil kā hai falītā
chhuTā jo shamla hai shaiḳh jī kā ye un kī sheḳhī laTak rahī hai

shukriya terā tire aane se raunaq to baḌhī
varna ye mahfil-e-jazbāt adhūrī rahtī

dasht-e-hairat meñ vahī merā junūñ mahv-e-ḳhirām
aa ke dekho ki yahāñ garmi-e-mahfil hai vahī

merī tanhā.ī ke ejaaz meñ shāmil hai vahī
raqs meñ hai dil-e-dīvāna ki mahfil hai vahī

vafūr-e-be-ḳhudī meñ rakh diyā sar un ke qadmoñ par
vo kahte hī rahe 'vāsif' ye mahfil hai ye mahfil hai

ma.amūr hai yuuñ mahfil-e-jānāñ na kisī kī
ābād rahe gor-e-ġharībāñ na kisī kī

aisī bhī koī ḳhaas ta.alluq kī fazā ho
mahfil meñ jab us kī na rahūñ aur rahūñ bhī

dil charāġh-e-mahfil hai lekin us ke aane tak
baar baar bujhtā hai baar baar jaltā hai

bigḌe the vo jis baat pe mujh se sar-e-mahfil
ai 'naqsh' dil us baat ko bhūlā to nahīñ hai

hāl-e-dil yaar ko mahfil meñ sunā.ūñ kyuuñ kar
mudda.ī kaan udhar aur idhar rakhte haiñ

bhāñp hī leñge ishāra sar-e-mahfil jo kiyā
tāḌne vaale qayāmat kī nazar rakhte haiñ

siskiyāñ bhartī hai to añgḌā.iyāñ letī hai to
uf ai makkāra bharī mahfil ko jal detī hai tū

vahī tū hai vahī tirī mahfil
ek 'fānī'-e-mubtalā hī nahīñ