Tags-Mehfil

vo ban sañvar ke phir mirī mahfil meñ aa ga.e
baiThe-biThā.e hashr kā sāmān ho gayā

ġhazab to ye hai ham ne mahfil kī mahfil
sunā kar vafā kī kahānī luTā dī

jāñ-ba-lab mahfil meñ un kī maiñ na thā yā dil na thā
kaun thā jo un ke tīr-e-nāz kā ghā.il na thā

mere hisse kā koī sāġhar sar-e-mahfil na thā
tere mai-noshoñ meñ saaqī kyā maiñ is qābil na thā

aa.iye ro leñ kahīñ rone se chain aa jā.egā
varna dard-e-dil bharī mahfil meñ pakḌā jā.egā

dekh le jān-e-vafā aaj tirī mahfil meñ
ek mujrim kī tarah ahl-e-vafā baiThe haiñ

sitam-ījādo dīvāreñ junūñ atvār hī Thahrīñ
tire mahfil meñ aa jaane pe be-zārī kabhī hogī

kabhī rote hue hañs duuñ kabhī hañste hue ro duuñ
kabhī mahfil sajā.ūñgī azā-dārī kabhī hogī

kaifiyat mahfil-e-ḳhūbāñ kī na us bin pūchho
us ko dekhūñ na to phir de mujhe dikhlā.ī kyā

vo ḳhalvat ho ki jalvat ho tajallī ho ki tārīkī
jahāñ tum ho usī ko ham bharī mahfil samajhte haiñ

kareñ kyā un se shikva jo kisī ke dil jalāne ko
faroġh-e-garmī-e-hañgāma-e-mahfil samajhte haiñ

dekhte hī rah ga.e qānūn-e-qudrat ahl-e-zabt
le uḌī ḳhākistar-e-parvāna jab mahfil kī baat

jahāñ ma.ashūq ho āshiq vahīñ us kā pahuñchtā hai
chaman meñ jaa.e parvāna na bulbul aa.e mahfil meñ

bahār-e-gulshan-e-hastī hai qaa.em shādī-o-ġham se
jo gul ḳhandāñ hai gulshan meñ to giryāñ sham-e-mahfil meñ

ḳhud hī vīrānī-e-dil ḳhud hī charāġh-e-mahfil
kabhī mahrūm-e-tamannā kabhī shaidā chehre

terī mahfil se uTh ke jaate haiñ
ab basā.eñge koī vīrāna

terī mahfil kā bharam rakhte haiñ so jaate haiñ
varna ye log to bedār nazar aate haiñ

har ḳhushī kī mahfil meñ qahqahe luTāte haiñ ḳhud hī lūTte bhī haiñ
ġham kī majlisoñ meñ bhī sab kā apnā apnā sar apnā apnā shāna hai

hotī thī kabhī mahfil-e-ahbāb meñ raunaq
taarī hai vahāñ ab to udāsī bhī ghuTan bhī

rahā kaun mahfil meñ ab aane vaalā
vo chāroñ taraf dam-ba-dam dekhte haiñ