Tags-Mehfil

sanam-kada hai ki ik mahfil-e-ḳhudā-vandāñ
bahut ḳhafā huā vo but jise ḳhudā na kahā

jin kī ḳhātir pī ga.e rusvā.iyoñ kā zahr bhī
vo bharī mahfil meñ ham par tanz farmāte rahe

mahfil se uTh jaane vaalo tum logoñ par kyā ilzām
tum ābād gharoñ ke vaasī maiñ āvārā aur badnām

phir sajāo mahfil-e-dār-o-rasan
muztarib hai phir zabān-e-guftugū

aur baḌh jā.egī vīrānī-e-dil jān-e-jahāñ
merī ḳhalvat-gah-e-ḳhāmosh ko mahfil na banā

taqve bhī bahak jāveñ haiñ mahfil meñ tumhārī
tum apnī in āñkhoñ se karāmāt karo ho

ham bhī nā-vāqif nahīñ ādāb-e-mahfil se magar
chīḳh uTheñ ḳhāmoshiyāñ tak aisā sannāTā bhī kyā

bharī mahfil meñ ham ne baat kar lī thī un āñkhoñ se
bas itnī baat kā yāroñ ne afsāna banā Daalā

mujh se kal mahfil meñ us ne muskurā kar baat kī
vo mirā ho hī nahīñ saktā ye pakkā kar diyā

aao kareñ mahfil pe zar-e-zaḳhm numāyāñ
charchā hai bahut be-sar-o-sāmānī-e-dil kā

na maiñ vārafta-e-mutrib na maiñ jāñ-dāda-e-sāqī
agar mahfil se uTh jā.ūñ to mahfil bad-gumāñ kyuuñ ho

'naushād' ham un kī mahfil se is vāste uTh kar aa.e haiñ
parvānoñ kā jalnā dekh chuke ab apnā taḌapnā dekheñge

hone do añdherā aaj kī shab gul kar do charāġhoñ ke chehre
ham aaj ḳhud apnī mahfil meñ dil apnā hī jaltā dekheñge

aisā lagtā hai ki mahfil muskurāne lag ga.ī
aa ke jab vo baiThtā hai muskurā ke sāmne

ye kaun chupke chupke uThā aur chal diyā
'ḳhātir' ye kis ne luuT liiñ mahfil kī dhaḌkaneñ

charāġh-e-shahr se sham-e-dil-e-sahrā jalānā
aur us kī lau se mahfil-e-ḳhāna-e-duniyā jalānā

bahut ziyāda haiñ ḳhatre badan kī mahfil meñ
par apnī ek hī mahfil hai jaanā paḌtā hai

faqat ik shaġhl bekārī hai ab bāda-kashī apnī
vo mahfil uTh ga.ī qaa.em thī jis se sarḳhushī apnī

'amīn'-ashraf kī hai pahchān ye bhī
bharī mahfil meñ vo tanhā milegā

shaiḳh-sāhab apnī izzat aap apne haath hai
mahfil-e-rindāñ meñ kyuuñ phir va.az farmāne ga.e