Tags-Mehfil

chhūne lage haiñ haath mire mehr-o-māh ko
mahfil kī āb-o-tāb-e-charāġhāñ se kyā mujhe

uThāte ho kyuuñ apnī mahfil se mujh ko
liyā maiñ ne kyā aap kā baiThe baiThe

zarā lau aur dil kī tez kar siilā sā ye sho.ala
na raushan kar sakā ghar ko na mahfil hī ke kaam aayā

ab aise qisse se fā.eda kyā ki kaun kitnā vafā-nigar thā
jab us kī mahfil se aa ga.e aur saarī bāteñ hī bhuul aa.e

tire siine meñ dam hai dil nahīñ hai
tirā dam garmi-e-mahfil nahīñ hai

roz mahfil se uThāte ho to dil dukhtā hai
ab nikalvāo to phir hazrat-e-ādam kī tarah

kuchh is andāz se aa.e tirī mahfil meñ dīvāne
koī ye kah to de mahfil meñ dīvāne bhī aate haiñ

zindagī meñ to vo mahfil se uThā dete the
dekhūñ ab mar ga.e par kaun uThātā hai mujhe

chhup gayā chāñd añdherā hai bharī mahfil meñ
tum mire dil meñ utar jaao ujāloñ meñ raho

is intizār meñ baiThe haiñ un kī mahfil meñ
ki vo nigāh uThā.eñ to ham salām kareñ

mahfil-e-rañg-o-bū to mil na sakī
ḳhvāhish-e-rañg-o-bū meñ kho.e rahe

phīkā phīkā hai mirī bazm-e-mohabbat kā charāġh
tum jo aa jaao to kuchh raunaq-e-mahfil ho jaa.e

yuuñ to jo chāhe yahāñ sāhab-e-mahfil ho jaa.e
bazm us shaḳhs kī hai tū jise hāsil ho jaa.e

ai qamar sub.h huī ab to uTho mahfil se
sham.a gul ho ga.ī ruḳhsat hue parvāne tak

dekhiye mahfil-e-sāqī kā natīja kyā ho
baat shīshe kī pahuñchne lagī paimāne tak

TuuT chaleñgī sab āshā.eñ tab hī jīvan raas aa.egā
kuchh din aur kaseñge ham par ta.ane mahfil mahfil log

chal ai merī ġharībī kā tamāshā dekhne vaale
vo mahfil uTh ga.ī jis dam to mujh tak daur-e-jām aayā

hameñ to raas na aa.ī kisī kī mahfil bhī
koī ḳhudā koī ham-sāya-e-ḳhudā niklā

kuchh nahīñ ham dil-jaloñ kī be-qarārī kuchh nahīñ
terī mahfil vo hai jis meñ sham-e-parvāna rahe