Tags-Mehfil

fikr-e-ġham-o-ālām 'rishī' hai goyā naam judā.ī kā
un kī mahfil meñ kab dil ko fikr-e-ġham-o-ālām huī

mahfil mahfil bāteñ niklīñ kyā kyā charche aam hue
terā adā-e-kam-āmezī kis had tak badnām huī

tire ḳhvāb aur ḳhayāloñ kī agar mahfil sajī ho to
kabhī gaa.e tire naġhme kabhī bantī sañvartī hai

ajab mahfil hai sab ik dūsre par hañs rahe haiñ
ajab tanhā.ī hai ḳhalvat kī ḳhalvat ro rahī hai

maiñ mahfil-bāz ghabrā kar huā tanhā.ī vaalā
ki sab se khul ke milnā kaam hai rusvā.ī vaalā

aanā zarā tafrīh rahegī
ik mahfil-e-sadmāt kareñge

tum husn kī ḳhud ik duniyā ho shāyad ye tumheñ mālūm nahīñ
mahfil meñ tumhāre aane se har chiiz pe nuur aa jaatā hai

mahfil-e-hashr meñ ye kaun hai mīr-e-majlis
ye to ham ne koī dekhī huī sūrat dekhī

muqābil husn jab aa.e sitam-zādoñ kī mahfil meñ
zabāñ ko qaid karnā hai nazar se baat karnī hai

mahfil meñ sabhī dost nahīñ aate haiñ
dushman bhī koī dost-numā aa.egā

misāl-e-sham.a haiñ sab rāt-bhar ke ye jalve
sahar ko uThnā hai is mahfil-e-jahāñ se hameñ

na maiñ jāñ-dāda-e-sāqī na maiñ vārafta-e-mutrib
agar mahfil se uTh jā.ūñ to mahfil bad-gumāñ kyuuñ ho

har ik hai un meñ kā be-shak aisā ki aap use jānte haiñ jaisā
dikhā.e mahfil meñ qadd-e-ra.anā jo aap aa.eñ to sar jhukā de

rāz-e-sar-basta na khul jaa.e hañsī ke ba.ad bhī
un kī mahfil meñ koī fitrat-shanās-e-ġham na ho

mahfil-e-ishq meñ vo nāzish-e-daurāñ aayā
ai gadā ḳhvāb se bedār ki sultāñ aayā

mujh ko uThvā to diyā us ne bharī mahfil se
kaun thā ye koī pūchhe to batā.e na bane

saarī mahfil jis pe jhuum uTThī 'majāz'
vo to āvāz-e-shikast-e-sāz hai

kaif-e-vīrānī-e-ḳhalvat se na mahfil se uThā
zauq-e-dil-bastagī jab tak na tah-e-dil se uThā

husn-e-ḳhalvat-talabī ke liye mahfil se uThā
ġhair az ishq jo jazba ho use dil se uThā