Tags-Mehfil

mujh ko tanhā chhoḌne vaale batā
kyā karūñ jab dil tirī mahfil na ho

dil dhaḌaktā hai ye kahte hue us mahfil meñ
yaañ kisī ko ḳhafaqāñ kī bhī davā aatī hai

kise fitna samajh kar apnī mahfil se uThātā hai
zamīr-e-amn is dhoke meñ nādāñ aa nahīñ saktā

ye be-gharī ye samundar ye raushnī dil kī
akele baiTh ke sochā kiye haiñ mahfil kī

adab se kaam vo lete nahīñ sar-e-mahfil
yuuñ hī ho aur koī dūsrā agar gustāḳh

jaane vāloñ kī taraf mat dekho
rañg-e-mahfil ko jamā rahne do

mujhī par paḌ rahī hai saarī mahfil meñ nazar un kī
ye dildārī hisāb-e-dostāñ dar-dil na ban jaa.e

tire sivā bhī kahīñ thī panāh bhuul ga.e
nikal ke ham tirī mahfil se raah bhuul ga.e

ham naġhma-sarā.ī kaise kareñ bedād-garoñ kī mahfil meñ
āñkhoñ se lahū kā raag bahe to jazb ho kis patthar-dil meñ

is daur-e-qadr-dān-e-suḳhan meñ ye ittifāq
shā.ir vahī hai raunaq-e-mahfil kaheñ jise

paatī nahīñ faroġh ba-juz soz-o-sāz-e-ishq
sham-e-hayāt dar-ḳhur-e-mahfil kaheñ jise

yūñhī shaam o sahar rahtā hai naqsha un kī mahfil kā
idhar das pāñch baiThe haiñ udhar do chaar leTe haiñ

hashr ko māntā huuñ be-dekhe
haa.e hañgāma us kī mahfil kā

sirf ḳhalvat kī hai shoḳhī ki abhī tak us ne
'shāz' kah kar mujhe mahfil meñ pukārā bhī nahīñ

kis tarah dosto mai-kashī chhoḌ duuñ
jaam o mahfil se hai vāsta phir mujhe

jahāñ par makr-o-fan ādāb-e-mahfil ban ke chhāyā ho
hameñ aisī kisī mahfil se kuchh nisbat nahīñ hotī

bas ek nazar jis kī ātish-zan-e-mahfil hai
vo barq-e-mujassam hai mahdūd mire dil tak

ik rāz-e-ġham-e-dil jab ḳhud rah na sakā dil tak
hone do ye rusvā.ī tum tak ho ki mahfil tak

idhar bhī ek uchaTtī nazar ki duniyā meñ
faroġh-e-mahfil-e-jam hī nahīñ kuchh aur bhī hai

mujhe yaqīn ki mahfil kī raushnī huuñ maiñ
use ye ḳhauf ki mahfil ḳharāb kar dūñgā