Tags-Mehfil

ghabrā.ī kyuuñ baiThī hai ab ġham-ḳhvāroñ ke narġhe meñ
le aa.ī hai mahfil meñ jab tū apnī tanhā.ī ko

ziyāda ho rahī thiiñ do sarā.eñ
maiñ phir mahfil kā hissa ban rahā thā

bazm-e-fikr-o-hosh ho yā mahfil-e-aish-o-nishāt
har jagah se chand nashtar chand ġham laatā huuñ maiñ

yahāñ sabhī kī rasā.ī to ġhair mumkin hai
ye tajrabāt kī mahfil hai bad-gumān na ho

mahfil-e-rāz meñ ham sah ga.e har vahm kī choT
āḳhir ik ishq kā me.aar banā kar uTThe

mire naġhmoñ se sahbā-e-kuhan bhī ho ga.ī paanī
ta.ajjub kar rahe haiñ rañg-e-mahfil dekhne vaale

ḳhat-e-sāġhar meñ rāz-e-haq-o-bātil dekhne vaale
abhī kuchh log haiñ saaqī kī mahfil dekhne vaale

sham-e-mahfil na the ki mahfil meñ
le ke ham zaḳhm-e-sar ga.e hote

hālāt kī ujḌī mahfil meñ ab koī sulagtā saaz nahīñ
naġhme to lapakte haiñ lekin sho.aloñ sā kahīñ andāz nahīñ

bū-e-gul nāla-e-dil dūd-e-charāġh-e-mahfil
jo tirī bazm se niklā so pareshāñ niklā

na tum aa.e to 'sābir' kyā maza aa.egā mahfil meñ
ġhazal-ḳhvānī to hogī par gul-afshānī nahīñ hogī

tire lab par vahī aatā thā jo har dil meñ hotā thā
vo ban jaatā thā shā.ir jo tirī mahfil meñ hotā thā

niyāz-o-nāz kī mahfil meñ terā naam rahtā hai
tire mastoñ ke aage ab bhī terā jaam rahtā hai

jhilmilāte nahīñ be-vaj.h to mahfil ke charāġh
ik nazar dekh to lo sāhab-e-mahfil kī taraf

bekal bekal rahte ho par mahfil ke ādāb ke saath
aañkh churā kar dekh bhī lete bhole bhī ban jaate ho

har sho.ala-gar-e-ahd-e-zulmat anjām se apne Dartā hai
jab zikr-e-sahar mahfil meñ chhiḌā kuchh sham.a kī lau tharrā hī ga.ī

lafzoñ ko tartīb meñ rakh kar paḌhtā huuñ har mahfil meñ
lahje kī imdād se maiñ āvāz ko bhārī kartā huuñ

mahfil-e-ruḳhsat-e-hamesha hai
aao ik hashr-e-hā-o-hū Thahre

maiñ us mahfil kī tohmat kis tarah āḳhir uThā.ūñgā
ḳhamoshī bhī jahāñ afsāna-dar-afsāna ho jaa.e

mahfil meñ ab ke aao to aisī ḳhatā na ho
rañg-e-libās rañg-e-badan se sivā na ho