Tags-Mehfil

charāġh ghar kā ho mahfil kā ho ki mandir kā
havā ke paas koī maslahat nahīñ hotī

tirī mahfil meñ ḳhālī haath aa.e
kisī ummīd par sab kuchh luTā ke

haTe ye aa.ina mahfil se aur tū aa.e
koī to ho jo kabhī dil ke rū-ba-rū aa.e

terī mahfil meñ raushnī ke liye
āñsuoñ ke diye jalā.e haiñ

muntazir thā vo na ham hoñ to hamārā naam le
us kī mahfil meñ hameñ apnī kamī achchhī lagī

vahī mahfil hai vahī log vahī hai charchā
ab bhulā baiThe haiñ ham shakl-e-gunahgār ki tū

ġhair yuuñ nikleñ us kī mahfil se
jis tarah ai 'nizām' naam mirā

un makānoñ meñ bhī insān hī rahte hoñge
raunaqeñ jin meñ nahīñ aap kī mahfil kī sī

rañg mahfil kā ajab ho gayā jis dam us ne
ḳhāmushī ko bhī mirī husn-e-talab batlāyā

bahut masrūf thā mahfil meñ maanā
nahīñ kuchh boltā par dekhtā to

ba-qadr-e-shauq nahīñ lutf-e-mahfil-ārā.ī
shadīd-tar hai sar-e-bazm apnī tanhā.ī

hāl-e-dil yaar ko mahfil meñ sunā.eñ kyūñ-kar
mudda.ī kaan idhar aur udhar rakhte haiñ

ek 'shātir' ke na hone se bigaḌtā kyā hai
terī mahfil rahe ābād tirā naam chale

zulf-e-mo.ambar us ne jo kholī to yuuñ mahfil saarī mahkī
aave chaman se mausam-e-gul meñ bād-e-sabā kā jaise jhoñkā

'farāsat' ab huī mahfil tamām ghar ko chalo
sarak rahī hai falak par ridā-e-āḳhir-e-shab

tamāshā dekhte hī dekhte un kī adāoñ kā
sar-e-mahfil ḳhud apne ko tamāshā kar liyā maiñ ne

ab ḳhushbuoñ ke naam pate DhūñDte phiro
mahfil meñ laḌkiyoñ ke dupaTTe badal ga.e

jis kī mahfil ko 'ravish' jannat-e-fardā kahiye
kal usī ḳhusrav-e-ḳhūbāñ se mulāqāt huī

havā ne ehtirām-e-mahfil-e-qudsī meñ apnā.ī ravish gul kī
fidā is ḳhāmushī par jauhar-e-taqrīr thā kal shab jahāñ maiñ thā

kisī ne mahfil-e-duniyā kī dhun badal Daalī
zamāna jab mirā ham-raqs hone vaalā thā