Tags-Mehfil

phirī kyuuñ kar nigāh-e-sāqī-e-gulfām kyā kahiye
bharī mahfil meñ asbāb-e-shikast-e-jām kyā kahiye

tire ḳhayāl kī mahfil jo sajne lagtī hai
qarīb-e-hāl guzishta zamāne lagte haiñ

jitne the jāñ-nisār vo sab ho ga.e nisār
raunaq hī raunaq aap kī mahfil meñ rah ga.ī

ho ijāzat to terī mahfil meñ
apnī qismat ko āzmā.ūñ kyā

tere baġhair 'sāhnī' tāroñ ke darmiyāñ
mahfil udaas thī rah-e-vīrān kī tarah

naġhma koī chheḌo 'darvesh'
mahfil mahfil vīrānī hai

jo kisī dil meñ chal rahī hai abhī
aisī mahfil kisī ko kyā ma.alūm

tulū-e-sub.h kī afvāh par mahfil se us kī
hazāroñ anjum-o-mahtāb ruḳhsat ho ga.e haiñ

rañg-e-mahfil to badlā nahīñ
laakh koshish maiñ kartā rahā

rokā hī kiyā zabt-e-mohabbat sar-e-mahfil
sar jhuk hī gayā us but-e-ayyār ke aage

allāh re chashm-e-sāqī-e-mahfil kā lutf-e-ḳhās
sab yuuñ hī rah ga.e mujhe paimāna mil gayā

tujhe dānista mahfil meñ jo dekhā ho to mujrim huuñ
nazar āḳhir nazar hai be-irāda uTh ga.ī hogī

ik ruuh bulātī hai anāsir ke qafas se
par hosh kisī ḳhvāb kī mahfil meñ chhupā hai

misl-e-parvāna fidā har ek kā dil ho gayā
yaar jis mahfil meñ baiThā sham-e-mahfil ho gayā

mahfil meñ jise ma.alūm nahīñ ehsās kī karvaT kyā shai hai
vo dil kī suunī vaadī meñ ġham kī añgḌā.ī kyā jaane

maiñ saare bārbād-kun ḳhayāloñ ko dil kā mehmāñ banā rahā huuñ
ḳhirad kī mahfil ujaḌ chukī hai junūñ kī mahfil sajā rahā huuñ

dil pe qaabū ho to ham bhī sar-e-mahfil dekheñ
vo ḳham-e-zulf hai kyā sūrat-e-zebā kyā hai

yārān-e-mai-kada jo kabhī yaad aa ga.e
mujh meñ ḳhumār-e-mahfil-e-pārīna jī uThā

sham.a phīkī raat kam mahfil udaas
ab muġhannī kā tarāna aur hai

le gayā vo saath apne gulshan-e-dil kī bahār
suunī suunī hai mirī mahfil kise āvāz duuñ