Tags-Mehfil

jahāñ chāhūñ vahīñ mahfil sajā luuñ
mirī har ik nazar husn-āfrīñ hai

dekhne hī na diyā un ko 'rishī' mahfil meñ
kuchh tahayyur ne kuchh andesha-e-rusvā.ī ne

ye aur baat rahā be-niyāz mahfil meñ
yuuñ mere haal se vo be-ḳhabar na thā koī

bazm-e-fikr o hosh ho yā mahfil-e-aish o nashāt
har jagah se chand nishtar chand ġham laatā huuñ maiñ

sab kaho par hameñ ḳhudā ke liye
apne mahfil meñ ajnabī na kaho

uThūñ dahshat se tā mahfil se us kī
itaab us kā hai har ik ham-nashīñ par

mahfil meñ koī soḳhta-jāñ hī nahīñ 'shakīl'
soz-o-gudāz-e-sham.a pe aañsū bahā.e kaun

pahchānte nahīñ use mahfil meñ dost bhī
chehra ho jis kā gard-e-alam se aTā huā

chalā hai mahfil se apne saaqī dikhā.ūñ maiñ apnī ashk-bārī
karūñ bat-e-mai ko murġh-e-ābī abhī se dariyā bahā bahā kar

kahāñ vo shakleñ kahāñ vo bāteñ kahāñ vo jalse kahāñ vo mahfil
ye sab kā sab ḳhvāb kā thā sāmāñ chhupā liyā bas dikhā dikhā kar

duā lab-e-jām ne bhī māñgī subū ne bhī haath uThā uThā kar
hamārī mahfil meñ aayā saaqī ḳhudā ḳhudā kar ḳhudā ḳhudā kar

lau sham.a kī bujhne ko hai ai gul
mahfil meñ na koī dil jalā ho

rūdād-e-shab-e-ġham yuuñ Dartā huuñ sunāne se
mahfil meñ kahīñ un kī sūrat na utar jaa.e

tapish patiñgoñ ko baḳhsh deñge lahū charāġhoñ meñ Dhaal deñge
ham un kī mahfil meñ rah ga.e haiñ to un kī mahfil sambhāl deñge

mere tasavvur ne baḳhshī hai tanhā.ī ko bhī ik mahfil
tū mahfil mahfil tanhā ho ye bhī to ho saktā hai

usī ko hashr kahte haiñ jahāñ duniyā ho fariyādī
yahī ai mīr-e-dīvān-e-jazā kyā terī mahfil hai

ahl-e-mahfil dekhte hī 'saif' be-ḳhud ho ga.e
har adā saaqī kī sharh-e-jām ho kar rah ga.ī

to kyuuñ vo garmī-e-mahfil vo dil-kashī na rahī
niyāz-mand agar jān-e-bazm-e-nāz nahīñ

jab bhī bazm-e-ālam meñ koī fitna uThtā hai
yā tumhārī mahfil se yā ġharīb-ḳhāne se

jis se baat bhī karnī mushkil vo bhī is mahfil meñ hai
'mus.haf' kaisā lutf rahegā us ko sher sunāne meñ