Tags-Memories

ḳhud hī kartā huuñ tirī yādeñ maiñ maazī ke sipurd
phir kahīñ se ek lamha DhūñD kar laatā huuñ maiñ

tamām yādeñ mahak rahī haiñ har ek ġhuncha khilā huā hai
zamāna biitā magar gumāñ hai ki aaj hī vo judā huā hai

us ko kyā yādeñ thiiñ kyā aur kis jagah par rah ga.iiñ
tez hai dariyā-e-dil apnī ravānī meñ bahut

chand yādeñ haiñ mirī ziist kā hāsil 'bāqar'
inhīñ yādoñ ke sahāre huuñ ġhazal-ḳhvāñ ab tak

terī yādeñ mirī ibādat haiñ
sochtī huuñ tujhe vuzū kar ke

na jaane kyuuñ tirī yādeñ tavāf kartī haiñ
kisī malāl se pahle kisī malāl ke ba.ad

naqsh haiñ ab varaq varaq dil par
chand yādeñ kitāb kī sūrat

terā har naqsh miTātī huī yādeñ terī
aur phir mujh ko tirī yaad dilāte hue log

terī yādeñ ho ga.iiñ jaise muqaddas āyateñ
chain aatā hī nahīñ dil ko tilāvat ke baġhair

bāteñ us ek yaad kī bātoñ kā husn haiñ
yādeñ us ek yaad kī yādoñ pe bojh haiñ

ye dil pe bojh hai dardoñ kā yā tirī yādeñ
yā ābloñ kā harārat se hai pighal jaanā

yādeñ chaleñ ḳhayāl chalā ashk-e-tar chale
le kar payām-e-shauq ka.ī nāma-bar chale

zaḳhm maazī ke 'hinā' rahte haiñ har dam taaza
dil ke ik band darīche kī haiñ yādeñ qaidī

dukh hai Thahrā huā nigāhoñ meñ
terī yādeñ bilo rahī hai raat

ye shab-e-tanhā.ī 'sādiq' mujh ko Das letī magar
shukr hai yādeñ dar-e-dil kī nigahbāñ ho ga.iiñ

kal us ke hijr kī dīvār toḌ dī ham ne
na.e zamāne meñ yādeñ purānī kyā karte

aisī yādeñ bhī haiñ sau zindagiyāñ jin pe nisār
hāsil-e-zīst ġham-e-umr-e-ravāñ hī to nahīñ

biitī rut kī sab pahchāneñ bhuul ga.e to phir kyā hogā
ga.e dinoñ kī yādeñ jab be-manzar hoñgī tab socheñge

sukh dukh meñ garm-o-sard meñ sailāb meñ bhī haiñ
yādeñ tumhārī mausam-e-shādāb meñ bhī haiñ

ḳhuun ne terī yādeñ sulagtī huī raat ko sauñp diiñ
āñsuoñ ne tirā dard rūkhī havā ke havāle kiyā