Tags-Memories

terī yādeñ hī sabab hai merī is hañsī kā ab
ya.anī yādoñ meñ maiñ aañsū bhī milā nahīñ rahā

vo sard shaam vo bārish vo lāpatā yādeñ
kisī ne shaal meñ 'sāhir' chhupā liyā thā mujhe

tujh ko dene ko hai mere paas batā kyā kuchh bhī nahīñ
tujh se bāteñ terī yādeñ merī daulat saarī dekh

ab to aatī haiñ kuchh is tarah tumhārī yādeñ
dhuup meñ jaise kisī chehre se bādal guzreñ

ek purāne giit kī dhun ne guzrī yādeñ yaad dilā diiñ
dāman ko ashkoñ se bhigo.e ek zamāna biit chalā thā

mausam-e-hijr meñ tirī yādeñ
dasht meñ ābshār kī sūrat

kitnī yādeñ thiiñ ki gard-e-rah-e-ayyām huiiñ
kitne chehroñ kā huā dhyān meñ laanā mushkil

vahāñ tumhāre bhī bachpanoñ kī hasīn yādeñ haiñ dafn yaaro
ḳhudā gavāh hai vatan meñ tum ko tumhāre qasbe bulā rahe haiñ

abhī tak to tirī yādeñ mirī mīrās thiiñ lekin
tasavvur meñ kahāñ se ik nayā chehra nikal aayā

agar kabhī yuuñ lage ki sab kuchh añdherī rātoñ ke daao par hai
to aisī rātoñ meñ Dar na jaanā to chāñd yādeñ ujaal rakhnā

terī yādeñ mirī muhāfiz haiñ
terī yādoñ ko maiñ ne Dhaal kiyā

terī yādeñ haiñ shab-bedāriyāñ haiñ
hai āñkhoñ ko shikāyat jāntā huuñ

kitnī yādeñ
jalā chukā huuñ maiñ

tere va.ade terī yādeñ tere naġhme tere ḳhvāb
husn se bharpūr daulat mere kāshāne meñ hai

terī sūrat terī chāhat yādeñ sab
chhoTe se is dil meñ kyā kyā rakkhūñgā

biite hue dinoñ kī haiñ yādeñ bhī ik azaab
rahtā hai zehn-o-qalb pe un kā sadā itaab

kabhī kabhī ye dil kartā hai
yādeñ phir se taaza kar luuñ

zehn-o-dil tere tasavvur se ghire rahte haiñ
mujh ko bāhoñ meñ liye rahtī haiñ yādeñ terī

ek parde meñ haiñ dar-parda bahut se parde
terī yādeñ haiñ pur-asrār hijāboñ kī tarah

ye bhūlī-bisrī yādeñ haiñ sarmāya-e-zīst mirā 'barqī'
kis tarah karūñ meñ is ko raqam kuchh yaad rahā kuchh bhuul ga.e