Tags-Memories

sunahrī yādeñ hī paltī rahīñ jis āñgan meñ
maiñ us mahal ke dar-o-bām honā chāhtā huuñ

dil meñ ruktī nahīñ tirī yādeñ
nok-e-mizhgāñ se aa Tapaktī haiñ

un se baḌh-chaḌh ke to ai dost haiñ yādeñ in kī
nāz-o-andāz-o-adā meñ tirī rakkhā kyā hai

tire chhupne se chhupeñgī na hamārī yādeñ
tū jahāñ hogā vahīñ zikr hamārā hogā

tumhārī yādeñ tilismāt haiñ nikalnā kyā
tumārī yaad ke pahre uThā ke rakkhe haiñ

bulātī haiñ tumheñ yādeñ purānī
charāġh-e-raftagāñ fursat nikālo

yādeñ Tīseñ sī ban kar rah jaatī haiñ
guzrā mausam phir kab lauT ke aatā hai

hazār talḳh hoñ yādeñ magar vo jab bhī mile
zabāñ pe achchhe dinoñ kā hī zā.iqa rakhnā

mire kamre meñ yādeñ so rahī haiñ
maiñ saḌkoñ par bhaTaktā phir rahā huuñ

na dekhā jāma-e-ḳhud-raftagī utaar ke bhī
chalī ga.iiñ tirī yādeñ mujhe pukār ke bhī

terī yādeñ bhī kar ga.iiñ hijrat
ab to kuchh bhī nahīñ bachā mujh meñ

sahar-dam sohbat-e-rafta kī yādeñ
mire pahlū meñ āñkheñ mal rahī haiñ

aa ki vābasta haiñ us husn kī yādeñ tujh se
jis ne is dil ko parī-ḳhāna banā rakkhā thā

yuuñ tujhe dekh ke chauñk uThtī haiñ soī yādeñ
jaise sannāTe meñ āvāz lagā de koī

uThā kar taaq pe rakh deñ sabhī yādeñ
nahīñ jo tū tirī yādoñ se kyuuñ uljheñ?

rāteñ saarī karvaT meñ hī biit rahīñ
yādeñ bhī kitnī bechainī detī haiñ

suno musāfir! sarā.e-jāñ ko tumhārī yādeñ jalā chukī haiñ
mohabbatoñ kī hikāyateñ ab yahāñ se Derā uThā chukī haiñ

miTTī kā rizq ho gayā kuchh yādeñ chhoḌ kar
kis se kaheñ ki shaad sā pyārā bhī dost thā

yahī yādeñ haiñ le jā.eñgī ham ko āḳhrī dam tak
na koī ham-safar hogā na jā.egā koī ghar tak

terī sūrat terī chāhat yādeñ sab
chhoTe se is dil meñ kyā kyā rakkhūñgā