Tags-Memories

yādeñ khule kivāḌ ye mahkī huī fazā
kaun aa rahā hai shaam ye ThanDī havā ke ba.ad

shab-e-firāq mire ham-navā tirī yādeñ
ġhamoñ kī taal pe har dam nachā rahī haiñ mujhe

aaj bhī is marhūm kī yādeñ ashkoñ se paivasta haiñ
dil dukhiyārā tere mere dard baTāyā kartā thā

vo jo sūrat thī saath saath kabhī surḳh mahke gulāb kī sūrat
us kī yādeñ utartī rahtī haiñ zehn-o-dil pe azaab kī sūrat

dopahar niiñd yādeñ parind
phir se karne lage tañg sab

kuchh yādeñ aur kitābeñ hoñ mirā ishq ho aur yārāne hoñ
isī āb-o-havā meñ rahnā ho aur saarī umr bitānī ho

kitnī yādeñ haiñ ki jhoñkoñ kī tarah tairtī haiñ
chhoḌ aatī hai safar meñ jinheñ mañjdhār havā

raah bhūle hue sayyāh ko tanhā pā kar
luuT letī haiñ miTā detī haiñ chhup kar yādeñ

thak ke duniyā se agar kījiye ḳhvāboñ kī talāsh
niiñd uḌā detī haiñ afsāne sunā kar yādeñ

himmat-e-koh-kanī par bhī kabhī bhārī haiñ
aur tultī haiñ kabhī nok-e-mizha par yādeñ

jab bhī maazī ke dayāroñ se guzar hotā hai
kāsa-e-chashm liye phirtī haiñ dar-dar yādeñ

haiñ kabhī ḳhūn-e-tamannā kī shanāvar yādeñ
shāḳh-e-dil par haiñ kabhī barg-e-gul-e-tar yādeñ

koī ḳhud-rafta-o-gum-gashta bhaTaktā hai jahāñ
ajnabī ban ke vahāñ miltī haiñ akasr yādeñ

umr ko kartī haiñ pāmāl barābar yādeñ
marne detī haiñ na jiine ye sitamgar yādeñ

ahd-e-rafta ke pur-asrār ghane jañgal meñ
phūñk kar sehr banā detī haiñ patthar yādeñ

terī yādeñ sarāb sahrā ke
tū hī 'sīmā' ko ab dikhe har-sū

yādeñ hotī haiñ samundar ke
sāhil par ghūmte ek bachche kī tarah

jo yādeñ akasr taḌpātī hai is dil ko
un yādoñ kā dil meñ melā kyuuñ lagtā hai

hamāre kamre meñ us kī yādeñ nahīñ haiñ 'fāzil'
kahīñ kitābeñ kahīñ risāle paḌe hue haiñ

terī yādeñ ho ga.iiñ jaise muqaddas āyateñ
chain aatā hī nahīñ dil ko tilāvat ke baġhair