Tags-Mohabbat

zabt chāhe use ruḳhsat kī ijāzat mil jaa.e
ashk āñkhoñ se mohabbat ke sile māñgtā hai

ab dard-e-mohabbat ko ai dil minnat-kash-e-darmāñ kaun kare
ḳhud apne hī hāthoñ ulfat kā barbād gulistāñ kaun kare

le ke hāthoñ meñ mohabbat ke guhar aa.e haiñ
ik nazar dekh tire ḳhāk-basar aa.e haiñ

uf ye ḳhāmosh mohabbat ki 'shamīm'
saare aalam ko pata ho jaise

mohabbat kī duniyā meñ mash.hūr kar duuñ
mirī sāda-dil tujh ko maġhrūr kar duuñ

mohabbat ke iqrār se sharm kab tak
kabhī sāmnā ho to majbūr kar duuñ

nahīñ zindagī ko vafā varna 'aḳhtar'
mohabbat se duniyā ko māmūr kar duuñ

ravā rakhūñ na ki hove malak bhī paas mire
kiyā hai bas-ki mohabbat ne bad-gumāñ mujh ko

mauj-e-ravāñ haiñ misra-e-be-sāḳhta tire
bahr-e-suḳhan meñ bahr-e-mohabbat kā josh hai

abhī na chheḌ mohabbat ke giit ai mutrib
abhī hayāt kā māhaul ḳhush-gavār nahīñ

dekhā jise bhī us kī mohabbat meñ mast thā
jaise tamām shahr ho daarū piye hue

jis ne dil merā diyā dām-e-mohabbat meñ phañsā
vo nahīñ mālūm muj ko nāsehā kyā chiiz hai

hove ik qatra jo zahrāb-e-mohabbat kā nasīb
ḳhizr phir to chashma-e-āb-e-baqā kyā chiiz hai

sunā rahā huuñ unheñ jhūT-mūT ik qissa
ki ek shaḳhs mohabbat meñ kāmyāb rahā

ik sat.h-e-mohabbat pe khaḌā soch rahā huuñ
aisā na ho ye jhiil bhī daldal nikal aa.e

ye sach hai quvvat-e-tasḳhīr hotī hai mohabbat meñ
zafar-yābī magar harf-e-jalī lagtī nahīñ mujh ko

nigāhoñ ke jahāñ pahre na hoñ dil ke dhaḌakne par
jahāñ chhīnī na jaatī ho ḳhushī ahl-e-mohabbat kī

ham aur mohabbat ke sivā kuchh nahīñ karte
vo ruuTh gayā hai to manāne ke nahīñ ham

dariyā hai mohabbat to mile jism kā maidān
ik jism pyāle meñ samāne ke nahīñ ham

un ko to pās-e-mohabbat nahīñ aslan lekin
nibh sake tum se agar hazrat-e-dil aur nibhāo