Tags-Mohabbat

nazar ne kī nazr-e-rūh-o-dil pesh-e-lab pe shor-e-fuġhāñ se pahle
adā huā sajda-e-mohabbat ḳharosh-e-bāñg-e-azāñ se pahle

nazar hai vīrāñ mirī to kyā ġham nazar ke jalve to haiñ salāmat
na the tum itne hasīñ mirī mohabbat-e-rā.egāñ se pahle

divāna ban phirā maiñ dar-ba-dar thā
mohabbat meñ nibhānā chal rahā hai

thā ek rāz-dār-e-mohabbat se lutf-e-zīst
lekin vo rāz-dār-e-mohabbat kahāñ milā

nahīñ chāra kisī ke paas is kā
mohabbat ek dard-e-lā-davā hai

zindagī dekh tirī ḳhaas ri.āyat hogī
ik mohabbat hai mire paas agar karne de

dil betāb-e-marg-e-nā-gahāñ baaqī na rah jaa.e
mohabbat kā ye nāzuk imtihāñ baaqī na rah jaa.e

mohabbat kī hadeñ is ālam-e-imkāñ se baalā haiñ
kisī kī justujū meñ lā-makāñ baaqī na rah jaa.e

mohabbat meñ haiñ sabr-o-shukr ke har-chand ham qaa.il
magar kuchh kuchh kabhī lab par shikāyat aa hī jaatī hai

nahīñ jazb-e-dil-e-āshiq se hai ma.ashūq ko chāra
agar bedard bhī ho to mohabbat aa hī jaatī hai

pyāre beTe tū ne iiñT gaare cement aur sariye vaalā makān to banā liyā hai
merī duā hai ki ye mohabbat amn ḳhushī aur ḳhush-hāl se bharā ghar ban jaa.e

ajab hālāt the yuuñ dil kā saudā ho gayā āḳhir
mohabbat kī havelī jis tarah nīlām ho jaa.e

juz mohabbat kise aayā hai mayassar 'ummīd'
aisā lamha ki jidhar sadiyoñ ke raste jaa.eñ

kartā nahīñ hai koī mohabbat yahāñ hameñ
aatī hai roz roz hameñ kyuuñ ye hichkiyāñ

mirī mohabbat kī dāstāñ sun ke ro paḌe 'josh-malsiyānī'
sukhā ke pañkhe se un ke aañsū abhī vahāñ se maiñ aa rahā huuñ

mirī mohabbat kī dāstāñ ko gad.he kī mat sarguzisht samjho
maiñ 'kirshn-chandr' nahīñ huuñ zālim yaqīn tum ko dilā rahā huuñ

mohabbat apne liye jin ko muntaḳhab kar le
vo log mar ke bhī marte nahīñ mohabbat meñ

shāyad kisī majzūb-e-mohabbat ko ḳhabar ho
kis sehr se dhartī ko gagan bāñdhe hue hai

mujh ko nafrat se nahīñ pyaar se maslūb karo
maiñ to shāmil huuñ mohabbat ke gunahgāroñ meñ

tire jaur-o-jafā kā ham kabhī shikva nahīñ karte
mohabbat jis se karte haiñ use rusvā nahīñ karte