Tags-Mohabbat

barbād-e-mohabbat kī duā saath liye jā
TuuTā huā iqrār-e-vafā saath liye jā

ham jurm-e-mohabbat kī sazā pā.eñge tanhā
jo tujh se huī ho vo ḳhatā saath liye jā

kyā huā gar ġhazal qasīda huī
āqibat qissa-e-mohabbat hai

ab bhī raushan hai tire dil meñ mohabbat kā diyā
raat phir sham-e-yaqīñ-sāz jalāne meñ kaTī

bolā thā jo āġhāz-e-mohabbat meñ baḌā bol
aayā vahī āḳhir dil-e-bīmār ke aage

rokā hī kiyā zabt-e-mohabbat sar-e-mahfil
sar jhuk hī gayā us but-e-ayyār ke aage

maiñ ibādat bhī huuñ maiñ mohabbat bhī huuñ zindagī kī numū kī alāmat bhī huuñ
merī palkoñ pe Thahrī namī ne kahā is namī ke liye ek taaza ġhazal

marqad se kushtagān-e-mohabbat nikal chuke
ab hashr tak ke vāste kāshāna mil gayā

sharāre soz-e-paiham ke bhaḌak jaa.eñ to achchhā hai
mohabbat kī hasīñ rāheñ chamak jaa.eñ to achchhā hai

sar-e-bazm-e-mohabbat kaash un āñkhoñ ke darpan meñ
mohabbat ke hasīñ manzar chamak jaa.eñ to achchhā hai

mohabbat meñ mire betāb dil kī dhaḌkaneñ hamdam
tirī āġhosh meñ aa kar jo thak jaa.eñ to achchhā hai

mohabbat meñ nahīñ mumkin pahuñchnā hadd-e-manzil tak
musāfir terī rāhoñ meñ bhaTak jaa.eñ to achchhā hai

numāyāñ hoñ na āñkhoñ se kahīñ ismat mohabbat kī
ye sho.ale dil ke dil hī meñ dahak jaa.eñ to achchhā hai

us ne pūchhā hai kyā mohabbat hai
ab bhalā kyā javāb duuñ us ko

mātam hai bapā tark-e-mohabbat kā mire ghar
kuchh lamhe siyāh-posh mire dar pe khaḌe haiñ

Dartā huuñ kahīñ is meñ utar jaa.e na koī
is dil meñ mohabbat ke ka.ī raaz gaḌe haiñ

mohabbat ke sabhī jazbe tumhāre naam kartī huuñ
vafā ke dil-nashīñ qisse tumhāre naam kartī huuñ

banāyā hai jinheñ maiñ ne mohabbat ke gulāboñ se
tar-o-tāza vo gul-daste tumhāre naam kartī huuñ

unheñ merī mohabbat kī nishānī tum samajh lenā
likhe haiñ maiñ ne jo naġhme tumhāre naam kartī huuñ

mohabbat meñ ḳhushī bhī kahkashāñ ma.alūm hotī hai
ye hastī ab hameñ lutf-e-jahāñ ma.alūm hotī hai