Tags-Mohabbat

hai guzrī kyā se kyā ishq-o-mohabbat ke tanāzur meñ
mohabbat ḳhārij-az-sūd-o-ziyāñ ma.alūm hotī hai

yuuñ mohabbat se jo chāhe koī apnā kar le
jo hamārā na ho us ke kahīñ ham hote haiñ

muTThiyoñ meñ ḳhaak le kar dost aa.e vaqt-e-dafn
zindagī bhar kī mohabbat kā silā dene lage

mohabbat meñ zabāñ ko maiñ navā-sañj-e-fuġhāñ kar luuñ
shikasta dil kī aahoñ ko harīf-e-nā-tavāñ kar luuñ

is qadar bhī na baḌho dāman-e-dil kī jānib
ye mohabbat koī tamsīl bhī ho saktī hai

māyūs-e-mohabbat hai to kar aur mohabbat
kahte haiñ jise ishq maraz bhī hai davā bhī

naḳhchīr-e-mohabbat kā qissa nahīñ tūlānī
lutf-e-ḳhalish-e-paikāñ āsūdgi-e-fitrāk

ramzīñ haiñ mohabbat kī gustāḳhī o bebākī
har shauq nahīñ gustāḳh har jazb nahīñ bebāk

mudām kaifiyyat apne dil meñ mai-e-mohabbat ke nashshe kī hai
ki saaqī is āftāb se hai dimāġh raushan murād hāsil

mohabbat hī binā ai 'barq' hai taḳhlīq aalam kī
mohabbat hī ko har aalam meñ ālam-gīr dekheñge

jī-dāro! dozaḳh kī havā meñ kis kī mohabbat jaltī hai
tez dahaktī aag zamīñ par ḳhandaq ḳhandaq chaltī hai

vallāh butoñ se nahīñ karne ke mohabbat
rakkheñge na ab rishta-e-zunnār kabhī ham

hamāre dars-e-mohabbat kā pūchhte kyā ho
kitābī chehra paḌhā hai kalām se pahle

kis kāfir-e-be-mehar se dil apnā lagā hai
jis meñ ki mohabbat na muravvat na vafā hai

izzat usī kī ahl-e-nazar kī nazar meñ hai
sab kuchh bashar meñ hai jo mohabbat bashar meñ hai

khel hai mohabbat meñ jaan o dil kā saudā kyā
dekhiye dikhātī hai ab ye zindagī kyā kyā

honī na chāhiye thī mohabbat magar huī
paḌnā na chāhiye thā ġhazab meñ magar paḌe

ham jalā lete agar terī mohabbat ke charāġh
in añdheroñ kī jagah dil meñ ujāle hote

mohabbat ḳhār-e-dāman ban ke rusvā ho ga.ī āḳhir
ye aqlīm-e-azīzāñ be-zuleḳhā ho ga.ī āḳhir

ilm ke taur pe sīkhe haiñ mohabbat ke rumūz
tum binā soche hī kah jaate ho dīvāna mujhe