Tags-Mohabbat

kaun kāfir tujhe ilzām-e-taġhāful degā
jo bhī kartā hai mohabbat se gilā kartā hai

hañsūñ juuñ gul tire zaḳhmoñ se ulfat is ko kahte haiñ
tū gaalī de duāoñ meñ mohabbat us ko kahte haiñ

kitne subuk-dil hue tujh se bichhaḌne ke ba.ad
un se bhī milnā paḌā jin se mohabbat na thī

mohabbat aise kī 'bedār' saḳht mushkil hai
jo apnī jaan se guzre vo us kī chaah kare

zulmat o nuur meñ kuchh bhī na mohabbat ko milā
aaj tak ek dhundalke kā samāñ hai ki jo thā

vo sarv-qad kī mohabbat kā tauq juuñ qumrī
huā hai mere gale haar dekhiye kyā ho

kisī par jaan denā be-niyāz-e-mudd.ā ho kar
yahī jazba mire nazdīk me.arāj-e-mohabbat hai

vo mujh se be-ḳhabar haiñ un kī aadat hī kuchh aisī hai
maiñ un ko yaad kartā huuñ mohabbat hī kuchh aisī hai

had se baḌh kar mohabbat munāsib nahīñ is meñ andesha-e-bad-gumānī bhī hai
dushmanoñ se ta.alluq to hai hī ġhalat dostoñ meñ bhī kuchh fāsla chāhiye

kaun dariyā-e-mohabbat se utar saktā hai paar
kashtī-e-farhād āḳhir koh se Takrā ga.ī

ai kātib-e-taqdīr ye taqdīr meñ likh de
bas us kī mohabbat mirī jāgīr meñ likh de

jalāl-ud-ddīn-akbar se na kahnā
mohabbat kī kahānī likh rahā huuñ

kaunain badal jaa.e magar tū na badalnā
tere hī sabab ahl-e-mohabbat kā bharam hai

kar apnī nazar se mire īmān kā saudā
ai dost tujhe merī mohabbat kī qasam hai

pairahan us ne mohabbat ke ma.ānī ko diye
maalā pahnā.ī lage haath mire lafzoñ kī

ik mohabbat kā fusūñ thā so abhī baaqī hai
mujh meñ ik raqs-e-junūñ thā so abhī baaqī hai

ġharīq-e-bahr-e-mohabbat kī lī ḳhabar na kabhī
ḳhudā se sharm na kuchh tujh ko nāḳhudā aa.ī

āñkheñ raushan lahje ras ke pyāle jī
ye haiñ log mohabbat karne vaale jī

udhar jo shaḳhs bhī aayā use javāb huā
koī nahīñ jo mohabbat meñ kāmyāb huā

bil-āḳhir aag dhuāñ ho ga.ī mohabbat kī
kisī ke saath jo dekhā thā ḳhvāb ḳhvāb huā