Tags-Mohabbat

jab tak ki mohabbat kā chalan aam rahegā
har lab pe mirā zikr mirā naam rahegā

yāroñ kī mohabbat ne
'ash.had' ko sambhālā hai

mohabbat meñ jafā kyā hai vafā kyā
vo ye pūchheñ to shikvoñ kā mazā kyā

baġhāvat aur phir in kī razā se
mohabbat meñ duā kyā mudda.ā kyā

ba-juz ashkoñ kī būñdeñ aur aaheñ
'jalīl' āḳhir mohabbat se milā kyā

pahlū meñ jāgtī hai mohabbat kabhī kabhī
aatī hai haath dard kī daulat kabhī kabhī

zā.iqa talḳh hai mohabbat kā
aadmī zahr-e-ġham piye na piye

zamāna kis qadar be-gāna-e-rasm-e-mohabbat thā
yahāñ to ḳhud se bhī nā-āshnā rahnā paḌā mujh ko

kyā usī kā hai vafā nām-e-mohabbat hai yahī
mehrbāñ ham pe kabhī vo sitam-ārā na huā

dil vahī dil hai haqīqat kī nazar meñ ai dil
sard jis dil meñ mohabbat kā sharārā na huā

DhūñDhtā aa.egā kal ahl-e-mohabbat ko yahī
ġham nahīñ aaj zamāna jo hamārā na huā

ye mohabbat kā fasāna bhī badal jā.egā
vaqt ke saath zamāna bhī badal jā.egā

ik mohabbat bharī nazar ke sivā
aur kyā ahl-e-dil kī qīmat hai

yahī hisāb-e-mohabbat dobāra kar ke laao
jahāñ jahāñ hai munāfe.a ḳhasāra kar ke laao

baḌā yaqīñ hai mohabbat ke mo.ajizoñ pe tumheñ
to lo ye qatra-e-ashk aur sitāra kar ke laao

vo ban kar chāñd tab utrā thā is dil kī zamīñ par
mohabbat kā jab āñkhoñ meñ sitāra hī nahīñ thā

ab naza.a kā aalam hai mujh par tum apnī mohabbat vāpas lo
jab kashtī Dūbne lagtī hai to bojh utārā karte haiñ

ishq ke parastāro kuchh kamī to hai varna
bul-havas mohabbat meñ kāmyāb ho jaa.e

ho sabr ki betābī ummīd ki māyūsī
nairañg-e-mohabbat bhī be-kār nazar aayā

ik nazar bhuul ke us samt bhī dekhā hotā
kuchh mohabbat ke sivā aur bhī sochā hotā