Tags-Mohabbat

us ne ham par ik mohabbat kī nazar kyā Daal dī
haath jaise ham ġharīboñ ke ḳhazāne lag ga.e

dīvār-e-zindāñ ke pīchhe
jurm-e-mohabbat meñ baiThā huuñ

mohabbat ho ki nafrat ho usī se mashvara hogā
mirī har kaifiyat meñ istiḳhāra saath hotā hai

mire maulā ne mujh ko chāhatoñ kī saltanat de dī
magar pahlī mohabbat kā ḳhasāra saath rahtā hai

agar 'sayyad' mire lab par mohabbat hī mohabbat hai
to phir bhī kis liye nafrat kā dhārā saath rahtā hai

dil jis kā nahīñ harf-e-mohabbat se shanāsā
vo zindagī vīrān mazāroñ kī tarah hai

likhne baiThūñ jo mohabbat kā fasāna maiñ kabhī
unvāñ 'resham' ho magar zikr tumhārā rakkhūñ

mohabbat meñ ik aisā vaqt bhī dil par guzartā hai
ki aañsū ḳhushk ho jaate haiñ tuġhyānī nahīñ jaatī

rah-e-hayāt meñ jo log jāvedāñ nikle
vahī vafā-o-mohabbat ke tarjumāñ nikle

yaqīñ bahut thā mohabbat pe tum ko apnī 'adīl'
yaqīñ ke badle vahāñ bhī faqat gumāñ nikle

visāl-o-hijr to do lafz haiñ mohabbat meñ
ta.alluqāt meñ haiñ aur silsile kitne

tire hī dil meñ hai jalva-farmā butoñ kī sūrat ḳhudā kā jaadū
yahī hai dair aur yahī hai ka.aba yahī mohabbat kā ghar hai pyāre

khel samjhā thā magar tark-e-mohabbat ai 'saif'
ġhaur anjām pe karnā thā qasam se pahle

sitam-zarīf mohabbat ko jurm kahte haiñ
gunāh-gār ko jiine kā aasrā to milā

haa.e tire pāband-e-mohabbat
qaidī aañsū mujrim aaheñ

zindagī ho ki mohabbat ho shams'
aisī chīzoñ pe bharosa mat kar

tū bhī vahāñ nahīñ mohabbat jahāñ nahīñ
har āstān-e-husn tirā āstāñ nahīñ

isī ko kyā maiñ mohabbat kī zindagī kah duuñ
ye silsila tirī yādoñ kā aaj tak kyuuñ hai

tumhāre ḳhat meñ mohabbat ke rañg bikhre haiñ
jo ye ġhalat hai to lafzoñ meñ phir dhanak kyuuñ hai

vo sargarm-e-bayān-e-sozish-e-dāġh-e-mohabbat huuñ
hazar kartā hai sho.ala bhī mirī ātish-bayānī se