Tags-Mohabbat

sukūn-e-qalb ke asbāb ham pe band rahe
magar ham ahl-e-mohabbat vafā-pasand rahe

mohabbat kyā agar yuuñ sūrat-e-ilzām ho jaa.e
nazar nākām aur zauq-e-nazar badnām ho jaa.e

mohabbat rah chukī aur mātam-e-anjām baaqī hai
vo āñkheñ ashk bhar laa.eñ to apnā kaam ho jaa.e

thī mohabbat meñ nañg minnat-e-ġhair
jazb-e-dil ko rasā kiyā tū ne

vo maañ kī mohabbat kī bulandī thī ki us ne
zinda hī na chhoḌā mujhe mar jaane ke Dar se

ye bārgāh-e-mohabbat hai merī ḳhalvat hai
mire harīf qadam ehtiyāt se rakhnā

aaj gahvāre meñ baiThe haiñ sabhī ahl-e-adab
is fazā hī ko mohabbat kī fazā kahte haiñ

ye bhī ik rañg hai shāyad mirī mahrūmī kā
koī hañs de to mohabbat kā gumāñ hotā hai

na buġhz dil meñ rahe na nafrat bas ek duuje se ho mohabbat
ham aao ta.amīr phir se kar leñ vahī jo hindostāñ thā pahle

ho mohabbat kī ḳhabar kuchh to ḳhabar phir kyuuñ ho
ye bhī ik be-ḳhabarī hai ki ḳhabar rakhte haiñ

hāsil-e-tark-e-mohabbat dekhnā
anjuman suunī paḌī hai āj-kal

musalsal chalte rahne kī ḳhushī meñ leT jaatī hai mohabbat ghaas meñ
patthar kī sil par yādgārī sīḌhiyoñ ke beach

'qatīl' ab tak nadāmat hai mujhe tark-e-mohabbat par
zarā sā jurm kar ke aaj bhī pachhtā rahā huuñ maiñ

sabr lāzim hai tujhe koh-e-mohabbat pe zarūr
jazb-e-dil ko tū kahīñ taisha-e-farhād na kar

kyā āsmāñ uThāte mohabbat meñ jab ki dil
tār-e-nigah meñ uljhī huī ik patañg thā

is meñ haiñ merī mohabbat ke vo saare armāñ
jin se mahrūm rahā merā ye bedār shabāb

ye fitrat husn kī hai aur vo tīnat mohabbat kī
jise tum ne jafā samjhā use ham ne vafā jaanā

tum agar jaan ga.e ho to laboñ ko sī lo
yahī ḳhāmosh-mohabbat hai asāsa merā

is taraf josh-e-mohabbat us taraf josh-e-shabāb
aa gayā haañ un pe dil be-iḳhtiyār aa hī gayā

ajab nahīñ jo mohabbat mujhe samajh na sake
vo ajnabī huuñ jise ziist bhī na pahchāne