Tags-Mohabbat

ġharq ho jaate mohabbat meñ mohabbat-āshnā
sāhil-o-dariyā se bhī kar ke kinārā dekhte

ishq meñ ḳhud se mohabbat nahīñ kī jā saktī
par kisī ko ye nasīhat nahīñ kī jā saktī

kuchh to mushkil hai bahut kār-e-mohabbat aur kuchh
yaar logoñ se mashaqqat nahīñ kī jā saktī

vo ajab daur-e-mohabbat thā zamāna thā na vaqt
jaise donoñ hoñ kisī ālam-e-lā-fāni meñ

vo bhī tasvīr sā āġhāz-e-mohabbat meñ rahā
maiñ bhī thā ā.īna-ḳhānoñ kī sī hairānī meñ

ahd-e-nau ne tābish-e-husn-e-rifāqat chhīn lī
qarya-e-jāñ meñ mohabbat kā samundar so gayā

guzar rahe haiñ shab-o-roz is tarah 'māhir'
na zindagī se mohabbat na zindagī se gurez

bā.is-e-amn-o-mohabbat hai agar merā lahū
qatra qatra ba-ḳhudā de ke chalā jā.ūñgā

haa.e ye un kā tarz-e-mohabbat
aañkh se bas ik buuñd girā dī

hisāb us kī mohabbat kā harf harf karūñ
jo aa gayā thā mirī tishnagī ke sāmāñ ko

shahr baaqī hai mohabbat kā nishāñ baaqī hai
dilbarī baaqī hai dil-dāri-e-jāñ baaqī hai

ġham-e-mohabbat meñ dil ke dāġhoñ se rū-kash-e-lāla-zār huuñ maiñ
fazā bahārīñ hai jis ke jalvoñ se vo harīf-e-bahār huuñ maiñ

khaTak rahā huuñ har ik kī nazroñ meñ bach ke chaltī hai mujh se duniyā
zahe girāñ-bārī-e-mohabbat ki dosh-e-hastī pe baar huuñ maiñ

tirī mohabbat meñ mere chehre se hai numāyāñ jalāl terā
huuñ tere jalvoñ meñ mahv aisā ki terā ā.īna-dār huuñ maiñ

abhī ashkoñ meñ ḳhuuñ shāmil nahīñ hai
mohabbat kā junūñ kāmil nahīñ hai

zamāne se mohabbat kā abhī tak
ye hāsil hai ki kuchh hāsil nahīñ hai

aaj tak tanz-e-mohabbat kā asar baaqī hai
qahqahe gūñjte phirte haiñ bayābānoñ meñ

ik martaba dil pe iztirābī aa.ī
ya.anī ki ajal merī shitābī aa.ī

galī kā aam sā chehra bhī pyārā hone lagtā hai
mohabbat meñ to zarra bhī sitārā hone lagtā hai

tark-e-mohabbat karne vaalo kaun aisā jug jiit liyā
ishq se pahle ke din socho kaun baḌā sukh hotā thā