Tags-Mohabbat

vīrānī-e-māhaul ko barbādī-e-dil ko
har daur meñ āsār-e-mohabbat na samajhnā

dekhe jo tumheñ koī mohabbat kī nazar se
lillāh 'shakīl' us ko mohabbat na samajhnā

pahle to mohabbat rafta rafta hosh-o-ḳhirad ko khotī hai
phir yaad kisī kī aa aa kar kāñTe se dil meñ chubhotī hai

jis vaqt ham ne jhuum kar azm-e-safar
lākhoñ charāġh rāh-e-mohabbat meñ jal ga.e

ai dost ham ne ishq-o-mohabbat kī raah meñ
Thokar to saḳht khaa.ī thī lekin sambhal ga.e

kaho to tum ko ḳhudā maan leñ mohabbat kā
ki ham ko tum sā koī dūsrā nahīñ miltā

lagā majnūñ ko zahr-e-ishq kyā āb-e-baqā ho kar
vo zinda ho gayā goyā mohabbat meñ fanā ho kar

kuchh aisī thī kashish mujh meñ ḳhirāj-e-husn bhī paayā
huā mash.hūr maiñ ishq-o-mohabbat kā ḳhudā ho kar

maiñ ne dekhā sunā husn kā vāqi.a jab paḌhā to kahā
vo kitāb-e-mohabbat kī āyāt the ishq kā baab the

luTne kā Dar sahī pa mohabbat kī raah meñ
jaanā to usī galī se har ik aadmī kā hai

sad-āfrīñ ḳhayāl to achchhā hai vāqa.ī
āñkhoñ ko band kar ke mohabbat ubūrnā

turfa koī kyā jaane ġham ahl-e-mohabbat kā
jaatī hai nazar kis kī zaḳhm-e-dil-e-insāñ tak

tamām josh-e-mohabbat tamām hirs-o-havas
vafā ke naam pe har bevafā se qaa.em hai

mohabbat naam hai us kā ta.alluq naam hai us kā
na ham āzād hote haiñ na vo āzād karte haiñ

jazboñ meñ pahle jaisī sadāqat nahīñ rahī
ab darmiyāñ hamāre mohabbat nahīñ rahī

ai 'hādia' shu.ūr-e-mohabbat jise diyā
ab vo hī kah rahā hai ki ulfat nahīñ rahī

maut se vahshat hai logoñ ko mohabbat maal se
bāñg-e-be-hañgām hai kūs-e-rahīl-e-kārvāñ

bas ab mohabbat se haath uThāo bhale ko kahte haiñ maan jaao
na aap ko is tarah miTāo 'jalīl' dekho to haal kyā hai

aaj zaḳhmoñ ko mohabbat kī atā ke badle
tohfa o tamġha-e-ahbāb-shanāsī likkhūñ

sarf ho jā.eñge ham us kī mohabbat meñ yūñhī
sarf ho jā.eñge ham tasḳhīr ho sakte nahīñ