Tags-Mohabbat

aaheñ bhī nahīñ ruktīñ naale bhī nahīñ thamte
aur un ko mohabbat kā afsāna sunānā hai

bulbul kī mohabbat se vo raaz rahe kab tak
kaliyoñ kī zabāñ par jo mub.ham sā fasānā hai

nākām mohabbat kī allāh re majbūrī
jiine kī nahīñ fursat marne ko zamānā hai

kyā qahr hai ai 'bāsit' ye tab-e-hayā-parvar
un kī hī mohabbat hai un se hī chhupānā hai

nā-vāqif-e-ādāb-e-mohabbat ko sazā kyā
ai husn-e-azal tere ḳhatā-kār bahut haiñ

mumkin nahīñ ki dard-e-mohabbat ayaañ na ho
khiltī hai jab kalī to mahaktī zarūr hai

ishq kā naaz vafā husn kā ehsān jafā
ham jo TuuTe to mohabbat ke idāre TuuTe

aur is daave kī ham tardīd kar sakte nahīñ
log kahte haiñ mohabbat hī mohabbat hai yahāñ

kis ko kahte haiñ jafā kyā hai vafā yaad nahīñ
ai mohabbat mujhe kuchh tere sivā yaad nahīñ

ho ga.ī ḳhatm rah-o-rasm-e-mohabbat shāyad
maiñ vafā bhuul gayā un ko jafā yaad nahīñ

yuuñ bhī kar sakte ho barbād-e-mohabbat pe karam
ham ne maanā ki tumheñ ahd-e-vafā yaad nahīñ

jis se 'aḳhtar' ho mire dard-e-mohabbat kā ilaaj
kyā masīhā-nafasoñ ko vo davā yaad nahīñ

tū mire ishq kī rūdād nahīñ samjhegā
kyuuñ mohabbat meñ huuñ barbād nahīñ samjhegā

sho.ala-e-mohabbat aur āb-e-ashk ai nādāñ
raushnī ko dariyā meñ kis liye girātā hai

āshob-e-mohabbat kā aañsū rakhtā hai talavvun fitrat meñ
āñkhoñ meñ rahe to qatra hai Tapke to samundar ho jaa.e

mohabbat meñ muravvat kī hikāyat ke suḳhan ḳhālī
ki juuñ fānūs dil kī sham.a bin hai pairahan ḳhālī

phailā.e jab daam havas ne rasm-e-mohabbat aam huī
past huā me.aar vafā kā ik duniyā badnām huī

ab kyuuñ na zindagī pe mohabbat ko vaar deñ
is āshiqī meñ jaan se jaanā bahut huā

kabhī dil meñ mohabbat ke hasīñ mausam nikharte haiñ
kabhī mujh se lipaT kar zindagī bhī raqs kartī hai

mujhe merī mohabbat par bahut hī maan hai 'vishma'
usī ke naam se ab zindagī kī saañs chaltī hai